सिरहा । सिरहाको मिर्चैया नगरपालिका वडा नम्बर – ५ का औषधी व्यवसायीमाथि गोली चलाएको आरोपमा प्रहरीले आफ्नै दाजु र भतिजो सहित तीन जनालाई पक्राउ गरेका छन् । मिर्चैया नपा ६ मुख्य चोकमै सिद्दि मेडिकल हल चलाएर बसेका ४० वर्षिय रामसागर साफीलाई पसलमै गत २२ गते गोली प्रहार गरेको आरोपमा प्रहरीले उनकै दाजु मिर्चैया ६ का ४२ वर्षिय सूर्यदेव साफी, भतिजो २३ वर्षिय रोहित साफी र गोलबजार नपा ११ बलकावाका ४५ वर्षिय मो. मुस्तकिम फकिरलाई प्रहरीले पक्राउ गरेका हुन् ।

सम्पतीको विवादका कारण आफ्नै दाई सूर्यदेवले भाडाका आपराधीक समूहको प्रयोग गरी ज्यान मार्ने उदेश्यले गोली चलाएको जिल्ला प्रहरी कार्यालय सिरहाका प्रमुख एसपी हिरा बहादुर पाण्डेले जानकारी दिए ।

प्रहरीले आपसि विवाद तथा आर्थिक किचलोका कारण घटना भएको बताइएको छ । प्रहरीले घटनाको हप्ता दिन भित्रै उनीहरुलाई विभिन्न ठाउँबाट पक्राउ गरी आज सार्वजनिक गरेको हो । उनीहरुमाथि ज्यान मार्ने उद्योगमा मुद्दा दर्ता गरिने बताइएको छ । फरार रहेका अन्य व्यक्तिहरुलाई इलाका प्रहरी कार्यलाय मिर्चैयाबाट खोजतलास गर्ने कार्य तथा थप अनुसन्धान भईरहेको बताइएको छ ।

आपराधीक समूहले चलाएको गोली साफीको दाँया खुट्टा र हातमा लागेको थियो । इलाका प्रहरी कार्यालय मिर्चैया भन्दा लगभग ५० मिटरको दुरीमा गोली चलेको थियो ।