काठमाडौं । प्रहरीको नीति निर्माणदेखि तालिमको शैक्षिक गुणस्तर उकास्न उल्लेख्य सहयोग गरेका डीएसपी समिरचन्द्र खरेलको कोभिड–१९ संक्रमणका कारण मृत्यु भएको छ । प्रहरीभित्र ‘एकेडेमिक किरो’ उपमा पाएका खरेल प्राय प्रहरीभित्र हुने लेखापढी, नीति निर्माण र तालिम शैक्षिक बिषयका काममा पोख्त अधिकृतका रुपमा परिचित थिए ।
इलाका प्रहरी कार्यालय इटहरीको प्रमुख रहँदा बहालवाला मेजरको लागूऔषध कारोबार भण्डाफोर गरेका खरेल केही समयअघि मात्र अनपोल मिसनबाट फर्किएका थिए । प्रहरी अस्पताल महाराजगञ्जमा दुई साताभन्दा बढि समयदेखी उपचार गराइरहेका खरेलको सोमबार अपरान्ह मृत्यु भएको हो । काभ्रेपलाञ्चोकको खरेल थोक स्थायी ठेगाना भएका खरेलका श्रीमती, एकछोरी र एक छोरा छन् ।
