पूर्वमन्त्री बस्नेतद्वारा स्वास्थ्य सामग्री वितरण

काठमाडौं । नेपाली कांग्रेसका केन्द्रीय सदस्य तथा पूर्व सूचना तथा सञ्चारमन्त्री मोहनबहादुर बस्नेतले सिन्धुपाल्चोकका विभिन्न स्थानमा स्वास्थ्य सामग्री वितरण गरेका छन्। उनले मेलम्ची नगरपालिका, हेलम्बु गाउँपालिका, ईन्द्रावती गाउँपालिका र पाँचपोखरी थाङ्पालकोट गाउँपालिकाका सबै वडालाई १ हजारका दरले मास्क प्रदान गरेका हुन्।

पूर्वमन्त्री बस्नेतले मेलम्ची प्राथमिक स्वास्थ्य केन्द्रलाई २५ सय मास्क ५ थान पीपीई सेट एवं सेनिटाइजर हस्तान्तरण गरे। साथै, केन्द्रलाई १० थान आइसोलेसन बेड र १० थान ४० लिटरको अक्सिजन सिलिन्डरको व्यवस्थापन गरिनेसमेत उनले बताए।

नेता बस्नेतले यसअघि पनि जिल्लाका विभिन्न स्थानमा अक्सिजन सिलिन्डरलगायत स्वास्थ्य सामग्री सहयोग गरिसकेका छन्। उनले सुनकोसी गाउँपालिका–६ मा रहेको थुम्पाखर खेल मैदानमा १ सय शय्याको कोभिड लगायत अन्य सरुवा रोग उपचार केन्द्र सञ्चालन गर्ने घोषणा गरिसकेका छन्।