काठमाडौँ । उमेर नपुगेका बालक वा बालिकासँग यौन सम्बन्ध बनाए वयस्क महिलालाई मुद्दा चल्ने भएको छ । अब भने १८ वर्षमाथिका महिलाले १८ वर्षभन्दा कम उमेरका बालक वा बालिकालाई यौनसम्बन्धी कसुर गरेमा मुद्दा चल्ने भएको हो ।
महान्यायाधिवक्ताको कार्यालयको व्यवस्थापन समितिको चैत २६ गते बसेकोे बैठकले यस्तो निर्णय गरेको हो । यसअघि महिलाले यौन दुरुपयोग गर्दैनन् भन्ने मान्यताका आधारमा वयस्क महिला र बालकको बीचमा करणी हुँदा बालकलाई मुद्दा चल्ने गथ्र्यो । नेपाल सरकार वादी हुने मुद्दाको अनुसन्धान र अभियोजनलाई प्रभावकारी बनाउन समितिले निर्देशहरु जारी गरेको हो ।
निर्देशन नं ९ मा वयस्क महिलाले नाबालकलाई यौन दुरुपयोग गरे गराएमा मुद्दा दायर गर्नेसम्बन्धी निर्देशन दिइएको हो । ‘मुलुकी अपराध संहिता २०७४ को दफा २२५ मा उल्लेख भएका कसुर बालिकाका विरुद्ध मात्र नहुने र बालकका विरुद्ध पनि हुने भएकाले’ यस्तो निर्देशन दिइएको समितिले जनाएको छ । मुलुक अपराध संहिता २०७४ को २२५ दफामा बालयौन दुरुपयोग गर्न नहुने सम्बन्धी व्यवस्था छ ।
उपदफा २ मा ‘कसैले करणीको आशयले बालबालिकालाई अस्वाभाविक रुपमा एकान्तमा लगेमा, यौनसम्बन्धी निजको अंगम छोएमा वा समातेमा, यौन सम्बन्धी आफ्नो अंग निजलाई छुन वा समाउन लगाएमा वा निजसँग अन्य कुनै किसिमको यौनजन्य अस्वाभाविक व्यवहार गरेमा बालयौन दुरुपयोग गरेको मानिने’ उल्लेख छ ।
फेसबुकबाट तपाईको प्रतिक्रिया !