दाङ । अदालतमा बयान फेर्ने युवतीलाई दाङ जिल्ला अदालतले एक महिना कैद सजाय सुनाएको छ । युवतीले बलात्कारको आरोप लगाएर पछि गत चैत २३ गते बसेको जिल्ला न्यायाधीश रितेन्द्र थापाको इजलासले बयान फेर्ने युवतीलाई एक महिना कैद र क्षतिपूर्ति स्वरुप आरोपित तीन युवालाई २५/२५ हजार रुपैयाँ उपलब्ध गराउनुपर्ने फैसला गरेको हो ।

घोराही उपमहानगरपालिका तीन युवाले आफूहरुमाथि बलात्कार गरेको भन्दै ती युवती र अर्की एक बालिकाले प्रहरीमा उजुरी दिएका थिए । प्रहरीले कात्तिक ४ गते आरोपितहरुलाई पक्राउ गरी अनुसन्धानपछि सरकारी वकिल कार्यालयमार्फत अदालतमा पेस गरेको थियो ।

अदालतमा मुद्दा पुगेपछि उनीहरुले बलात्कार नभई दुःख दिन उजुरी हालेको बकपत्र गरेका थिए । अदालतको समय बर्बाद गर्ने र राज्यको जनशक्ति र स्रोतमा क्षति पु¥याएको ठहर गर्दै सजाय सुनाइएको अदालतले जनाएको छ । नाबालिग भएकाले अर्की बालिकालाई भने छोडिएको छ ।