काठमाडौं । सम्पत्ति शुद्धिकरण अनुसन्धान विभाग तारकेश्वर यातायात प्रालि र नागार्जुन भैरव बचत तथा ऋण सहकारी संस्थाका अध्यक्ष यातायात व्यवसायी रामबहादुर लामा बिरुद्ध ७ करोड १२ लाख २१ हजार र उनकी श्रीमती कान्छी लामाविरुद्ध ६९ लाख पाँच हजार रुपैयाँ बिगो कायम गरी २०७७ चैत १२ मा विशेष अदालतमा मुद्दा दायर गरेको छ ।
लामाका बिरुद्ध मिटरब्याज र ठगीका धेरै उजुरी परेपछि काठमाडौं प्रहरी परिसरले लामालाई पक्राउ गरी मुद्दा चलाएर सम्पत्ति शुद्धिकरणमा पनि छानबिनका लागि पठाएको थियो । यातायात व्यवसायी रामबहादुर लामा दम्पतीले ठगी र मिटर ब्याजबाट अरब रुपैयाँ बराबरको सम्पत्ति जम्मा गरेका थिए । उनले मिटरब्याज र ठगीको रकम बैंकमा राखेका थिए ।
विभागले उनको बैंकखाता रोक्का नराखी उक्त रकम निकाल्न दिएको थियो । विभागका अनुसन्धान अधिकृतले लाभ लिएर बैंकखाता रोक्का नराखी रकम निकाल्न छुट दिएका थिए । लामाले ठगी र मिटरब्याजबाट अवैध सम्पत्ति आर्जन गरेको प्रारम्भिक छानबिनमा देखिएको थियो । लामालाई महानगरीय प्रहरी परिसर, काठमाडौंले गत वैशाखमा ठगी अभियोगमा पक्राउ गरेको थियो ।
ठगी मुद्दामा अदालतबाट १० लाख रुपैयाँ धरौटीमा छुटेका थिए । त्यसलगत्तै प्रहरीले लामालाई सम्पत्ति शुद्धीकरण अनुसन्धान विभाग पठाएको थियो । उनले बस बेच्ने बताउँदै पेस्की लिने र पछि रकम फिर्ता नगरी गाडी पनि कब्जा गर्ने गरेका थिए । प्रहरीका अनुसार बिक्री गर्ने बताउँदै गाडी चलाउन दिने, आफैँले चर्को ब्याजदरमा ऋण दिने र ऋण चुक्ता भएन भनेर गाडी फिर्ता लिने गर्थे ।
सहकारीबाट समेत उनले सदस्यहरूलाई नै ठगी गरेको उजुरी परेको थियो । अनुसन्धान सुरु भइसकेपछि विभागले लामाको बैंकखाता रोक्का राख्नुपर्ने हो । तर बैंकखाता रोक्का नराखी लामालाई ठूलो हिस्सा रकम निकाल्न छुट दिइएको थियो । लामाबाट लाभ लिएर मुद्दा पनि कमजोर बनाएर दर्ता गरेका छन् । अनुसन्धान सुरु गरिसकेपछि लामालाई बीसौं करोड हाराहारी रकम बैंकबाट निकाल्न दिइएकोबारेमा सम्पत्ति शुद्धिकरण अनुसन्धान विभागका प्रवक्ता सुशील आचार्यले भने–‘यो सबै गलत कुरा हो ।
बढी हल्ला आउँछ । छानबिन भएपछि बैंकबाट निकालेको छैन, निकालेको भए पनि रेकर्ड आइहाल्छ । रामबहादुर लामाले जति अपराध गरेको छ, त्यति बिगो माग गरी मुद्दा दायर गरिएको छ ।’ लामाको अनुसन्धान सकेर १ महिनाअघि नै मुद्दा बुझाउनुपर्ने थियो ।
