पुनःस्थापित सांसदले जीवन्त र जनमुखी भएर काम गर्ने सभामुख सापकोटाको भनाइ

काठमाडौं । सभामुख अग्निप्रसाद सापकोटाले पुनःस्थापित प्रतिनिधिसभाले जीवन्त र जनमुखी भएर काम गर्ने बताउनुभएको छ । जीपी कोइराला मेमोरियल सामुदायिक कलेजको आठौँ वार्षिकोत्सव समारोहलाई शनिबार काठमाडौंमा सम्बोधन गर्दै उहाँले कानून निर्माणमा चुनौती सामना गर्दै जनताको संसदप्रतिको विश्वासमा आघात नपर्ने गरि काम गरिने बताउनुभयो ।

उहाँले छलफल, बहस, वादविवाद र संवादबाट संसद् अघि बढ्ने भन्दै शान्ति र लोकतन्त्रका लागि लडेका २७५ जनाले संसद्लाई गति दिने विश्वास व्यक्त गर्नुभयो ।उहाँले वि.सं. २०५९ मा विघटन भइसकेको प्रतिनिधिसभा पुनःस्थापनाको कल्पना गरेर आन्दोलनका माध्यमबाट पूरा गराउनुले स्व. गिरिजाप्रसाद कोइरालाको दूरदृष्टि बुझ्न सकिने बताउनुभयो ।

त्यस्तै सांसद एवं कलेज व्यवस्थापन समितिका अध्यक्ष भीमसेनदास प्रधानले नेपालको लोकतान्त्रिक आन्दोलनमा महत्वपूर्ण योगदान गर्नु भई कार्यवाहक राष्ट्राध्यक्ष र सरकार प्रमुखकोसमेत भूमिका निर्वाह गरिसक्नुभएका गिरिजाप्रसाद कोइरालाको चर्चा गर्नुभयो ।