रौतहट । जिल्ला प्रहरी कार्यालय रौतहटले अवैध लागूऔषध अफिमका बिरुवाहरु नष्ट गरेको छ । मौलापुर नगरपालिका–७ सबैया पिपरियामा लगाइएका अफिमका बिरुवाहरु प्रहरीले शनिबार नष्ट गरेको हो । अलग–अलग स्थानमा गरी एक बिगाहाभन्दा बढी क्षेत्रफलमा खेती गरिएका अफिमका बिरुवा प्रहरीले नष्ट गरेको हो । रौतहटका ग्रामीण भेगमा किसानहरुले लुकिछिपी अफिम खेती गर्दै आएका छन् ।
मंसिर अन्तिमतिर रोपिएको अफिमको बिरुवा माघ–फागुनसम्म दाना लागेर तयार हुन्छ । दानालाई बिरुवामा भएकै बेला ब्लेडले चिरेर तरल पदार्थ चोप निकालेपछि प्रशोधन गरी लागूऔषध अफिम तयार हुने गर्दछ ।
बजार मूल्य अत्याधिक भएको हुनाले पनि यो खेतीतिर ग्रामीण भेगका केही किसान बढी आकर्षित भएका हुन् ।कानुनले बन्देज गरेको अवैध लागूऔषध अफिमको खेतीको बारेमा जानकारी आएपछि प्रहरीले बिरुवा नष्ट गरेको जिल्ला प्रहरी कार्यालय रौतहटका प्रमुख प्रहरी उपरीक्षक ( एसपी ) सिद्धिविक्रम शाहले बताए ।
प्रहरीले स्थानीय जनप्रतिनिधि, नागरिक अगुवा र सर्वसाधारणको सहभागितामा एक बिघा क्षेत्रफलमा लगाइएको अफिम नष्ट गरेको एसपी साहले बताए। साथै प्रहरीले रौतहटमा ‘सामुदायिक प्रहरी साझेदारी’ कार्यक्रमअन्तर्गत लागुऔषधसम्बन्धी जनचेतनामूलक कार्यक्रम गरेको छ ।
फेसबुकबाट तपाईको प्रतिक्रिया !