काठमाडौं । सत्तारूढ नेकपा एमालेका उपाध्यक्ष तथा सुदूरपश्चिम प्रदेशका संयोजक डा.भीमबहादुर रावलले आज प्रदेश कार्यालयमा गरिएको तोडफोडलाई गुण्डागर्दी र अराजकताको संज्ञा दिँदै घट्नामा संलग्नहरुलाई अविलम्ब कारबाही गरिनुपर्ने माग गरेका छन् । घट्नामा संलग्नहरुलाई कारबाही नगरिए उक्त घट्ना ओली सरकार संरक्षित थियो भन्ने पुष्टि हुने पनि उनको भनाई छ ।
घट्नाको निन्दा गर्दै आज अपरान्ह रिपोर्टर्स क्लब नेपालमा पत्रकार सम्मेलनको आयोजना गर्दै नेता रावलले यस्तो बताएका हुन् । घट्नाको बारेमा आफूले गृह प्रशासन र पार्टी नेतृत्व पँक्तिलाई पनि जानकारी गराईसकेको रावलले जनाए । उनले कर्ण थापाले आफूलाई स्वघोषित अध्यक्ष घोषणा गरेर गलत काम गरेको भन्दै कडा आपत्ति जनाए । उनले भने,‘बाजुराका कर्ण थापाको निर्देशनअनुसार केही कार्यकर्ताहरु गुण्डागर्दी शैलीमा प्रस्तुत भए । बाजुराको व्यक्ति, अर्कोले पनि हाम्रा साथीहरुलाई आक्रमण गरे । म यो घट्नाको निन्दा गर्छु । यो गतिविधिले एमालेलाई पनि फुटाउने हो ।’
संयोजक रावलले सर्वोच्च अदालतको फैसलाबमोजिम नेकपा (एमाले) र नेकपा (माओवादी केन्द्र) अलग/अलग हुने अवस्था आएको र आफूहरु अदालतको फैसला कार्यान्वयनतर्फ लागेको सुनाए । उनले भने,‘नेकपाको विवादसम्बन्धी सर्वोच्च अदालतले रिट निवेदकले माग दाबी गरेको भन्दा बढिनै फैसला दियो । तर, अदालतको फैसलालाई हामीले पालना गरेका छौं । नेकपा एमाले र माओवादी केन्द्र अलग अलग भएका छन् । अहिले कम्युनिष्ट पार्टी आन्दोलनलाई क्षतविक्षप्त पार्ने षड्यन्त्र भैरहेको छ । विगतमा जे÷जस्तो भएपनि यो आन्दोलनलाई सम्हाल्नुपर्छ । जोगाउनुपर्छ भनिएको छ । हामीले एमाले र माओवादी केन्द्रपनि अलग अलग हुँदा आ–आफ्नो पार्टीमा जाँदा, संयमित भएर जाने र काम गर्ने भनिएको छ । कार्यगत एकता गर्ने भनिएको छ ।’
रावलले नेकपा एमाले केन्द्रीय कमिटी बैठक छिट्टै बस्ने पनि सुनाए । उनले भने,‘त्यो बैठकबाट बैठकबाट निर्देशन आउला । विभिन्न कमिटी छन् । ती सबै विधिबाट जान्छन् । अब नयाँ किसिमले जान्छौं । एमाले महासचिव र उपमहासचिवसँग हिजै कुरा गरेको पनि थिएँ । तर, आज सुदूरपश्चिम प्रदेश कार्यालय, सरकारी पक्ष भनौं वा हामी बाहेकको अर्को गुटको पक्ष भनौं कि । आज विहान साँढे ११ बजे, अकस्मात, कैलाली र कञ्चनपुरका विभिन्न गाउँबाट आफ्ना पक्षका मान्छेहरुलाई बोलाएर, जबरजस्ती कार्यालयमा पसेर तोडफोड गर्ने काम भयो । हाम्रो भानुभक्त जोशीजीको कार्यालयमा ताला लगाईएको थियो । पाँच वटा कुर्सी भाँचेका छन् । म संयोजक थिएँ । मलाई नेतृत्व गर्ने अधिकार दिएको थियो । स्वतः म संयोजक हुँ । म संयोजक हुँ । एमालेले सुदुरुपश्चिम प्रदेशमा मेरो नेतृत्वमा अभूतपूर्व सफलता हाँसिल गर्यो ।’
उनले कर्ण थापाले स्वघोषित अध्यक्ष घोषणा गरेर गलत काम गरेको टिप्पणी गरे । उनले भने,‘तर, आज त्यहाँ गुण्डागर्दी शैलीमा प्रस्तुत भए । यसो नगर्नुहोस भनिएको थियो । अदालतको फैसलाअनुसार मैले नै नेकपा एमालेको साईनबोर्ड राख्न निर्देशन दिएको थिएँ । सोहीअनुसार राखिएको थियो । तर, आज बाजुराको व्यक्ति, अर्कोले पनि हाम्रा साथीहरुलाई आक्रमण गरियो । म निन्दा गर्छु । यो गतिविधिले नेकपा एमालेलाई पनि फुटाउने कतै षड्यन्त्र गरिएको होईन् । यो अत्यन्तै षड्यन्त्रमूलक, गुण्डागर्दी शैली हो । म भत्सर्ना गर्छु । कानूनी कारबाही गर्नुपर्छ । कारबाही गरिएन भने सरकार संरक्षित गुण्डागर्दी हो भनेर बुझ्नु्पर्छ । म सशक्त आवाज उठाउन एमाले पक्तिलाई आग्रह गर्छु।’ उनले यसरी नै गुण्डागर्दी, अराजकता लैजानै, मनपरीतन्त्र गर्ने हो भने आफूहरुलेपनि सशक्त प्रतिवाद गर्ने चेतावनी दिएका छन् ।
उनले सबैले हिजोको नकारात्मक कुराबाट शिक्षा लिनुपर्ने पनि जनाए । उनले भने,‘हिजो मैले ऋषि धमलाजीको अन्तर्वार्तामै भनेको छु । एमालेलाई बलियो बनाउने कुरा गरेको थिएँ । सुदुरपश्चिम प्रदेशको म नै संयोजक थिए । गुण्डागर्दी कर्ण थापाबाट भएको हो ।’
सर्वोच्च अदालतको फैसला आएपछि एमाले र माओवादी केन्द्र अलग अलग भएको अवस्थामा लेखराज भट्ट ईन्चार्ज बनाएर मेरो बोर्ड हटाउने हो त ? भन्दै उनले प्रश्न गरे । उनले भने,‘गुण्डागर्दी गरेर धम्कीले कसैको साईनबोर्ड तोडेर आफ्नो मान हुन्छ त ? गृह प्रशासनलाई खबर गरेको छु । हाम्रो सुरक्षा हामी आँफै गर्छौं भनेको छु । हाम्रो पार्टीका महासचिवलाई पनि जानकारी गराएको छु । कम्युनिष्ट आन्दोलनलाई जोगाउने उद्देश्य छ भने यस्तो काम बन्द गर्नुपर्छ । एमालेलाई पनि चकनाचुर गर्छौं भन्ने हो, बेग्लै कुरा हो । यस्ता काम बन्द गर्नुपर्छ । यसमा प्रधानमन्त्रीको पनि ध्यान जानुपर्छ ।’
उनले आफू नेकपा एमालेको नवौं महाधिवेशनबाट सबैभन्दा बढि मत ल्याएर उपाध्यक्ष जितेको व्यक्ति भएको सुनाए । सुदूरपश्चिम प्रदेशमा मात्रै नभएर पूर्वको जिल्लाहरुको बारेमा पनि त्यस्तै अराजक गतिविधि भैरहेको सुनेको उल्लेख गरे । उनले भने,‘मसँग अहिले यकिन जानकारी छैन् । तर, बाग्मती प्रदेशको एक जिल्लामा र प्रदेश एकको दुई जिल्लामा पनि त्यस्तै भएको छ ।’
उनले एमालेका हजारौं कार्यकर्ताहरु एकताको पक्षमा रहेको सुनाए । उनीहरु कम्युनिष्ट आन्दोलन जोगाउने पक्षमा रहेको रावलको भनाई छ । उनले भने,‘तर, पार्टीमा यस्तो गुण्डागर्दी शैली अपनाउने, उच्श्रृंखल शैली गर्नेको म घोर भत्र्सना गर्छु । म आम नेता तथा कार्यकर्तालाई त्यस्ता व्यक्ति चिन्न, सचेत हुन आग्रह गर्छु । आवश्यक परे आवाज उठाउन आग्रह गर्छु ।’
रावलले घट्ना भएलगत्तै आफूले एमाले महासचिवलाई फोन गरेर घट्नाबारे जानकारी गराएको सुनाए । उनले भने,‘म पार्टी कमिटीमा कुरा राख्छु । म नीति, पद्धती, विधिमा विश्वास गर्छु ।’ उनले विगतमा पनि पार्टी फुटाउन यस्ता तत्व लागेका हुन् कि भन्ने आशंक पुष्टि भएको सुनाए । उनले भने,‘उनीहरुले आफ्नो चरित्र देखाए । नेकपा एमालेले अब ती तत्व चिन्नुपर्छ ।
