धनुषा । जनकपुरधाममा आफ्नो डेरामै राखिएको अवस्थामा एक मोटरसाइकल चोरी भएको छ । धनुषा जिल्लाको जनकपुरधाम उपमहानगरपालिका–९ स्थित संकटमोचन मन्दिर छेउमै रहेको एक घरबाट पल्सर २ सय २० सिसीको मोटरसाइकल चोरी भएको हो ।

प्रदेश ०२–०२ प २१२१ नम्बरको मोटरसाइकल गएराति डेरामै राखिएको अवस्थाबाट चोरी भएको सवारीधनी महोत्तरीको भंगहा नगरपालिका–९ का रवि यादवले जानकारी दिए । ‘विहान उठेर बाहिरिँदा मोटरसाइकल नदेखेपछि होसै उड्यो । जबकी हेल्मेट र साँचो कोठामै छ,’ उनले भने ।

मोटरसाइकल चोरी भएको विषयमा निवेदन लिएर जिल्ला प्रहरी कार्यालय धनुषा जान लागेको उनले बताए । केहीदिनअघि जनकपुरबाटै पत्रकार राजकमल सिंहको पल्सर २ सय २० सिसिकै मोटरसाइकल समेत चोरी भएको थियो । तर हालसम्म भेटेको छैन् । पछिल्लो समय जनकपुरमा मोटरसाइकल चोरी बढेको छ । केहीदिन अघि धनुषा प्रहरीले मोटरसाइकल चोरको एक गिरोहलाई पक्राउ गरेपनि चोरी नियन्त्रण हुन सकेको छैन् ।