- काठमाडौं, फागुन २० गते बिहिवार ।।
- जनप्रभाव न्यूज
सरकारले सहसचिवको दरबन्दी रहेका जिल्लामा पनि उपसचिवहरुलाई प्रमुख जिल्ला अधिकारीमा खटाएको छ । २०७७ फागुन १४ गते गरिएको ५२ उपसचिव र सहसचिवहरुको सरुवामा यसअघि सहसचिव प्रजिअ रहेका जिल्लामा पनि उपसचिवलाई कामु दिएर पठाइएको छ । एउटा निर्वाचन क्षेत्र रहेको जिल्लामा समेत जनसंख्याका आधारमा सहसचिव प्रजिअ हुने गरी दरबन्दी सिर्जना गरेको सरकारले अहिले मनपरी ढंगले ४ वटा निर्वाचन क्षेत्र रहेको चितवनजस्तो जिल्लामा समेत उपसचिवलाई कामु दिएर पठाएको छ ।
प्रजिअ सरुवामा नेकपा माधव–प्रचण्ड समूह समर्थकलाई छानीछानी अपायक सरुवा गरी कांग्रेस समर्थक उपसचिव र सहसचिवहरुलाई महत्वपूर्ण जिल्लाको प्रजिअमा सरुवा गरिएको छ । चितवनमा गृह मन्त्रालयमा कार्यरत उपसचिव प्रेमलाल लामिछानेलाई प्रमुख जिल्ला अधिकारीमा खटाइएको छ ।
नुवाकोटामा सहसचिवको दरबन्दी रहेकोमा उपसचिव जीवनप्रसाद दुलाललाई प्रजिअमा पठाइएको छ । दोलखामा सहसचिवको दरबन्दी भए पनि उपसचिव बासुदेव घिमिरेलाई पठाइएको छ । जबकि चितवन, नुवाकोटभन्दा कम महत्व रहेको रामेछाप, सिन्धुलीजस्ता जिल्लामा सहसचिवलाई खटाइएको छ । रामेछापमा सहसचिव गौलोचन सैंजुलाई पठाइएको छ ।
राजाप्रसाद सेवाबाट आएका उनी सोझा र इमान्दार मानिन्छन् । अध्यागमन कार्यालय एयरपोर्टमा सेटिङवालाहरुसँग नमिलेपछि उनलाई रामेछापमा सरुवा गरिएको छ । सिन्धुली जिप्रकामा सुरेश न्यौपानेलाई पठाइएको हो । गोरखामा सहसचिव शालिग्राम शर्मा पौडेललाई पठाइएको छ । पर्वतमा पनि सहसचिवको दरबन्दी हो, तर उपसचिव देवी पाण्डे खत्रीलाई खटाइएको छ । दैलेखमा पनि सहसचिवको दरबन्दी रहेपनि उपसचिव हरिबहादुर प्याकुरेललाई पठाइएको छ ।
यसैगरी सरकारले सौताको रिसले पोईको काख… गरेझैं प्रमुख जिल्ला अधिकारीमा कांग्रेस समर्थकलाई महत्वपूर्ण जिल्लामा खटाएको छ । कांग्रेस भनेर चिनिने सहसचिव फणिन्द्रराम पोखरेल, तीर्थराज भट्टराईलगायतलाई प्रमुख जिल्ला अधिकारीमा खटाएको छ ।
बारामा ३ महिना अगाडि सरुवा भएका दीपकराज नेपाललाई स्याङजा पु¥याइएको छ । यसरी २/३ महिनामा प्रजिअ सरुवा गरेर सरकारले जिल्लामा कस्तो शान्ति सुरक्षा कायम गर्न खोजेको हो भन्ने प्रश्न उठेको छ । यसअघि बाँकेमा उपसचिव रामबहादुर कुरुम्बाङलाई प्रजिअका रुपमा १ वर्षभन्दा बढी समयदेखि राखिएको छ । उनी बर्दियामा पनि प्रजिअ थिए ।
