- काठमाडौं , फागुन १९ गते बुधबार ।।
- जनप्रभाव न्यूज
त्रिभुवन अन्तर्राष्ट्रिय विमानस्थलमा खटिएको प्रहरीले भन्सार छलीका सुनका बाला र औठीसहित सोमबार एक जनालाई पक्राउ गरेको छ । स्याङ्जाको चापाकोट नगरपालिका–६ घर भएका नगेन्द्रकुमार रानालाई प्रहरीले पक्राउ गरेको हो ।
हिमालय एयरलाइन्सको उडानद्वारा दुबईबाट काठमाडौं आएका यात्रुहरुलाई भन्सार छली गर्न लगाई ल्याएको सुनका ३ थान बाला र २ थान औंठी (१८६.५ ग्राम) संकलन गरी लैजान लागेको अवस्थामा रानालाई पक्राउ गरेको प्रहरीले जनाएको छ ।
बरामद सुनसहित रानालाई आवश्यक अनुसन्धान र कारबाहीको लागि त्रिभुवन विमानस्थल भन्सार कार्यालय, गौचर पठाइएको प्रहरीले जनाएको छ । यस्तै, प्रहरीले विमानस्थलबाट भन्सार छलीका इलेक्ट्रोनिक्स सामान तथा तयारी कपडासहित मंगलबार एक जनालाई पक्राउ गरेको छ । भोजपुर ट्याम्किमैयुङ गाउँपालिका–४ घर भएका २८ वर्षीय शिशिर राई पक्राउ परेका हुन् ।
उनलाई पनि हङकङबाट काठमाडौं आएका विभिन्न यात्रुहरुलाई भन्सार छली गर्न लगाई सामग्रीहरु लैजान लागेको अवस्थामा प्रहरीले पक्राउ गरेको हो । प्रहरीले ड्रोन क्यामेरा ५ थान, सोनी क्यामेराको ब्याट्री ८, क्यामेरा एडप्पटर १, ब्याट्री चार्जर १, तयारी कपडा (टिसर्ट, स्वीटर, ज्याकेट, पाईन्ट आदि) ७० थान, जुत्ता, पावर ब्यांक, फेसियल तेल बट्टा, परफ्यूम र झोला गरी अन्दाजी १५ लाख बराबारको सामान बरामद गरेको छ ।
