-
ललितपुर , फागुन १३ गते बिहिवार ।।
-
जनप्रभाव न्यूज
ललितपुर महानगरपालिकाले दुई वर्षअघि २०७६ मंसिर १७ गते माग गरी रोक्का गरिएको १४ को भर्ना प्रक्रिया पुनः सुरु गर्न लागेको छ । देशमा प्रतिनिधिसभा पुनस्र्थापना भएपछि नयाँ सरकार गठनको चरणमा भएको बेला प्रमुख निर्वाचन आयुक्त दिनेश थपलिया भने आफ्नो छोरालाई इन्जीनीयरमा जागिर खुवाउन चर्को दबाब दिइरहेका छन् ।
प्रमुख आयुक्त थपलियाको दबाबपछि ललितपुर महानगरपालिकाका मेयर चिरिबाबु महर्जन र प्रमुख प्रशासकीय अधिकृत विष्णु कोइरालाले इन्जीनियर भर्नालाई टुंग्याउने तरखर गरेका छन् । ललितपुर महानगरपालिकाले मागेको १४ इञ्जीनियर पदमा प्रमुख निर्वाचन आयुक्त दिनेश थपलियाका छोरादेखि मेयर चिरिबाबु महर्जन र कांग्रेसका शीर्षनेताका आफन्तसमेत छन् । सुरुमा करारमा भर्ना गर्ने र पछि स्थायी गर्ने प्रवृत्ति स्थानीय निकायमा व्याप्त छ ।
त्यसैकारण करारमा छोरालाई भर्ना गराउन प्रमुख निर्वाचन आयुक्त थपलिया हैसियत बिर्सेर दबाब दिइरहेको ललितपुर महानगरका एक वडाध्यक्षले बताए । उनका अनुसार प्रमुख आयुक्त थपलिया र चिरिबाबु महर्जनले छोरा र आफन्त भर्ना गर्न सबै प्रक्रिया मिचेका छन् । हामीले बिरोध गरेपछि रोकिएको थियो, नेकपा विभाजन र देशको वर्तमान अवस्थाको फाइदा उठाएर मेयर महर्जन प्रमुख प्रशासकीय अधिकृत बिष्णु कोइराला पुनः १४ इन्जीनीयर भर्ना गर्न लागेका छन् ।
प्रमुख निर्वाचन आयुक्त दिनेश थपलियाले आफ्ना छोरा सारांश थपलियालाई जेनतेन इन्जीनियर त बनाए, तर उनीसँग प्रतिस्पर्धा गरी पेशामा जम्ने क्षमता नभएपछि आफ्नो पावरको दुरुपयोग गरी ललितपुर महानगरपालिकामा इन्जीनियरमा भर्ती गर्न खोजेका हुन् । थपलियाले प्रमुख प्रशासकीय अधिकृत कोइरालालाई छिटो प्रक्रिया सुरु गर्न दबाब दिएका छन् ।
राज्यका पहुँचवाला थपलियासहितका भीआईपीका सन्तानलाई जागिर खुवाउन सेटिङ गरिएको सूचना थाहा पाएपछि महानगरका धेरै वडाध्यक्षहरुले विरोध गरे । वडाध्यक्षहरुको विरोधका कारण यसअघिका प्रमुख प्रशासकीय अधिकृत प्रेम भट्टराईले नतिजा प्रकाशित गर्न सकेनन् । दिनेश थपलियाले प्रेम भट्टराईलाई नै आफ्नो छोरालाई जागिरमा राख्नका लागि उक्त विज्ञापन गराउन लगाएका थिए । थपलियाले आफ्नै जिल्ला संखुवासभा घर भएका तत्कालीन संघीय मामिला तथा सामान्य प्रशासन मन्त्रालयका सचिव सूर्यप्रसाद गौतमलाई प्रयोग गरी उनले विज्ञापन गर्न लगाएका थिए । भट्टराईले जसरी पनि थपलियाका छोरालाई पास गराउने आश्वासन दिए, तर वडाध्यक्षको विरोधका कारण सकेनन् । उनको सरुवा धनुषाको प्रमुख जिल्ला अधिकारीमा भइसकेपछि विष्णु कोइराला गत असारमा ललितपुर महानगरमा प्रशासकीय अधिकृको रुपमा आए ।
सहसचिव बढुवा हुनासाथ उनी ललितपुर महानगरमा पदस्थापन भए । तत्कालीन सचिव सूर्यप्रसाद गौतमले जसरी पनि थपलियाका छोरालाई ललितपुर महानगरमा इन्जीनियर बनाउने प्रतिबद्धता जनाउँदै त्यसका लागि उपयुक्त पात्रका रुपमा कोइरालालाई प्रशासकीय अधिकृतमा पठाए । कोइरालालाई जानासाथ गर्नुपर्ने पहिलो एजेण्डा थपलियाका छोरालाई जागिर खुवाउने थियो । तर उनी गएको ९ महिनासम्म पनि थपलियाका छोरालाई भर्ती गर्न नसकेपछि थपलियाले पुनः ताकेता गराएका छन् । कोइराला र गौतम बिच सुसम्बन्ध भएकाले थपलियाले पुनः एकपटक इन्जीनियरको परीक्षा टुंग्याउन र पुत्रलाई जागिर खुवाउन ताकेता गरेका छन् । थपलियाको लगातारको ताकेतापछि कोइरालाले पुनः इन्जीनियर भर्ना प्रक्रिया टुंग्याउन अन्तर्वार्ताको लागि मिति तय गर्न लागेका छन् ।
नेकपा विभाजन भएको र महानगरमा कांग्रेस सबैभन्दा ठूलो दल भएकाले नेकपाको एउटा घटकलाई लिएर कार्यपालिकामा बहुमत जुटाउने प्रयास मेयर महर्जनको छ । इञ्जीनियर भर्नामा महर्जनको पनि स्वार्थ जोडिएको छ । कांग्रेसका नेताहरुका आफन्तलाई भर्ना गरिदिने भनेर उनले आश्वासन दिएका छन् । थपलियाका छोरादेखि नेताका आफन्तसम्मलाई भर्ना गर्न आवेदन दिने ३६ जनामध्ये पहुँचविहीन २२ जनालाई सर्टलिस्टमै पारिएन । अख्तियारका पूर्वप्रमुख आयुक्त नवीन घिमिरे र हालका प्रमुख आयुक्त प्रेमकुमार राईले पनि करारमा इन्जीनीयर भर्ना गर्न दबाब दिएका छन् । सबै पहुँचवालाको दबाबले गर्दा पहुँच नहुनेहरु सर्टलिष्टमै पर्न नसकेको वडाध्यक्षहरुको गुनासो छ ।
स्थानीय निकायमा सुरुमा करारमा छिर्ने र पछि संगठितरुपमा आन्दोलन गरेर स्थायी हुने परम्परा नै बसिसकेको छ ।
