म्यान्मार : इन्टरनेट बन्द, सेनाको बख्तरबन्द गाडी सडकमा

• एजेन्सी : फाल्गुन ३ गते सोमबार ।।
• जनप्रभाव न्यूज

निर्वाचित जनप्रतिनिधिलाई अपदस्त गरेर ‘कू’ गरेको म्यान्मारको सेना सडकमा निस्किएको छ । यसले सैन्य कदमविरुद्ध भइरहेका प्रदर्शन हिंसात्मक बन्ने चिन्ता बढाएको छ ।

बीबीसीका अनुसार, बख्तरबन्द गाडी याङ्गुनको सडकमा उतारिएको छ । सैन्य ‘कू’पछि पहिलोपटक यसरी म्यान्मारको सडकमा सेनाको बख्तरबन्दी गाडी उतारिएको हो ।

उत्तरी क्षेत्रको प्रदर्शनमा गोली चलेको आवाजसमेत सुनिएको छ । बीबीसीले स्वचालित हतियारबाट गोली चलेको बीबीसी समाचारमा उल्लेख भए पनि विस्तृत विवरण छैन ।

सडकमा सैनिक उत्रिएपछि पश्चिमा राष्ट्रका दूतावासहरूले हिंसाको प्रयोग नगर्न आग्रह गरेका छन्।

उता, इन्टरनेट सेवासमेत बन्द गरिएको छ ।

म्यान्मारमा फेब्रुअरी १ मा त्यहाँको जननिर्वाचित जनप्रतिनिधिलाई अपदस्थ गरेर सेनाले कू गरेको थियो । त्यसको विरोधमा प्रदर्शन चर्किंदै गएपछि सेनाले मौलिक हकहरूलाई थप संकुचित गर्दै लगेको छ ।