- काठमाडौं ,माघ १४ गते बुधबार ।।
- जनप्रभाव न्यूज
सरकारले सैनिक सेवा नियमावली (तेस्रो संशोधन) २०७७ अनुमोदन गरेको छ । सैनिक सेवा नियमावली २०६९ मा गरिएको संशोधनपछि अब ०६० वैशाख २८ गते र सोभन्दा पछिका सैनिकले सम्बन्धित विभागीय प्रमुखको स्वीकृतिमा सेवाबाट स्वैच्छिक अवकाश लिएर निवृत्तिभरण पाउने व्यवस्थामा परिवर्तन भएको छ ।
नयाँ व्यवस्थाअनुसार अबदेखि लप्टन र सोभन्दा माथि सेनापतिसम्मकाले २० वर्ष सेवा गरेपछि पेन्सनसहित अवकाश लिन सक्नेछन् । त्यसैगरी, सुवेदार र प्रमुख सुवेदारले १९ वर्ष र जमदारले १८ वर्षमा अवकाश लिन पाउनेछन् । प्युठ, अमल्दार र हुद्दाले १७ वर्ष तथा फलोअर्स र सिपाहीले १६ वर्षमा स्वैच्छिक अवकाश लिन पाउने व्यवस्था गरिएको छ ।
अवकाशको नयाँ व्यवस्थामा २० वर्ष सेवा अवधि नपुग्दै स्वैच्छिक अवकाश लिने जुनसुकै सैनिक व्यक्तिले नेपाली सेनामा भर्ना भएको मितिले २० वर्ष अवधि पूरा गरेको मितिबाट मात्र निवृत्तिभरण बापतको रकम प्राप्त गर्ने उल्लेख छ ।
रक्षा मन्त्रालयले मंसिर २१ गते सहमतिका लागि कानुन मन्त्रालयमा पठाएको नियमावलीको मस्यौदालाई पुस १६ गते सहमति दिएपछि नियमावलीले औपचारिक रूप ग्रहण गरेको हो ।जन आस्थाबाट
