प्रम ओली दोस्रो जङ्गबहादुर बन्न खोज्दैछन् : मानव अधिकारवादी नेता पहाडी

• काठमाडौं, पुस २१ गते मंगलवार ।।
• जनप्रभाव / सम्बादाता

मानवअधिकारवादी नेता कृष्ण पहाडीले संसद बिघटनको सिफारिस गरेर प्रधानमन्त्री केपी शर्मा ओलीले अर्को जंगबहादुर बन्ने प्रयास गरेको टिप्पणी गर्नुभएको छ । ओलीको प्रयासले अस्थिरतामा विदेशी र राजावादीले फाइदा उठाउन थालेको समेत उहाँका निष्कर्ष छ ।

‘केपी ओली दोस्रो जङ्गबहादुर बन्न खोज्दैछन्,’ पहाडीले काठमाडौंमा आयोजित एक साक्षात्कारमा भन्नुभयो ,‘संसद बिघटन गराउने उनको कदमले भारत र चीनले हस्तक्षेप गरेका छन् । विप्लव र राजावादीले समेत यसको फाइदा उठाउन थाले ।’ सर्वोच्च अदालतले यो बिघटनको पैmसलालाई मान्यता दियो भने अन्यले पनि सोही अनुसारको परम्परा पछ्याउने उहाँको दावी छ ।

पछिल्लो पटकको संसद विघटनबाट विश्व झनै चकित भएको पहाडीको कटाक्ष थियो । पार्टीको किचलोका कारण संसद बिघटन गरेको केपी ओलीको भनाईको उहाँले कडा आलोचना समेत गर्नुभयो ।

“संसदमा अविश्वासको प्रस्ताव आउछ भन्ने थाहा पाउनासाथ उनले संसद बिघटन गरे, आफ्नो पार्टीलाई पनि छोडेनन् र संसदलाई पनि छोडेनन्,” पहाडीको अगाडि भन्नुभयो, “सबै किसिमको संसदीय विकल्पको प्रावधान छोडेर उनले संसद बिघटन गरेका छन्, एकतिरबाट मात्रै ४० प्रतिशत भए पार्टी फुटाउन सक्ने जस्तो प्रावधान ल्याए, उनी मात्रै होइन माधब नेपाल र प्रचण्ड पनि यसका दोषी हुन् ।”

प्रतिनिधिसभामा पराजित भएका व्यक्ति मन्त्री हुन नसक्ने प्रावधानलाई उल्लंघन गर्दै हारेका व्यक्तिलाई पनि ओलीले मन्त्रीमा नियुक्ती दिएको तर्क पनि पहाडीको छ । कसैले पनि संसद पुनःस्थापना गर्न सक्दैन भन्ने केपी ओलीको भनाई अदालतकै मानहानी भएको पहाडीको निष्कर्ष छ ।

आणविक निषेध सन्धीको बिरोध गर्दै आएका पहाडी पछिल्लो समय केपी ओलीको संसद बिघटनको बिरोधमा होमिनु भएको छ । दुई तिहाईको प्रधानमन्त्रीले भारतको अयोध्या नक्कली भएको हावादारी कुरा गरेकाप्रति पनि उहाँको कटाक्ष थियो ।

“यो एउटा मानिसले धैर्य गुमाएको परिणाम हो, यो उनको एउटा सनकको परिणाम हो,”पहाडीको भनाई थियो । नेपालको विकास देखेर विश्व चकित छ भन्ने हावादारी नभएर प्रधानमन्त्रीको बहुलठ्ठी कुराबाट संसार चकित भएको पनि पहाडीले बताउनुभयो ।