संसद्को विशेष अधिवेशन बोलाउन माग गर्दै शीतल निवास पुगे नेकपा सांसद,निवेदन दर्ता गर्ने सचिव वेपत्ता

• काठमाडौँ : पुस १ गते बुधबार ।।
• जनप्रभाव – सम्बादाता

संघीय संसदको विशेष अधिवेशनको माग गर्दै नेपाल कम्युनिस्ट पार्टी ( नेकपा ) का केही सांसदहरु आज राष्ट्रपति कार्यालय शीतलनिवास पुगेका छन् । नेकपाका स्थायी कमिटीका एक सदस्यकाअनुसार मंगलबार जारी संवैधानिक परिषद् सम्बन्धी अध्यादेशमाथि छलफलका लागि अधिवेशनको माग गर्दै निवेदन लिएर सांसदहरु शीतलनिवास पुगेका हुन् ।

तर, पौने एक बजे नेकपाका सांसदहरु शीतलनिवास पुगे पनि उनीहरुको निवेदन भने दर्ता भएको छैन् । शीतलनिवास पुगेका एक सांसदले राष्ट्रपति कार्यालयका सचिव निवेदन दर्ता गर्न छाडेर त्यहाँबाट निस्केको बताए । उनले आफुहरुले उनलाई पर्खिरहेको पनि बताए ।

नेपाल कम्युनिस्ट पार्टी ( नेकपा ) का सांसद पम्फा भुसाल र भीम रावलसहितको टोली निवेदन लिएर शीतलनिवास पुगेका छन् । उनीहरु सांसदहरुको हस्ताक्षरसहित विशेष अधिवेशन माग गर्दै राष्ट्रपति कार्यालय पुगेका हुन् ।

संसदको एक चौथाई सांसदले लिखितरुपमै निवेदन दिए विशेष अधिवेशन बोलाउनुपर्ने संवैधानिक व्यवस्था छ ।

एकटा अधिवेशनदेखि अर्कोको बिचको अवधि ६ महिना भन्दा बढी हुन नपाइने संवैधानिक बाध्यताका कारण पुस १७ सम्म भने अनिवार्यरुपमा संसद बोलाउनुपर्ने अवस्था छ । यस्तो बाध्यात्मक अबस्था भए पनि सरकारले अधिवेशन बोलाउन आलटाल गरेको बरु एकपछि अर्को अध्यादेशको तयारी गरेको आंशकासहित नेकपा सांसदले विशेष अधिवेशनको माग गरेका छन् ।