भारतीय बजारबाट सुनसरीको कृषि बजारमा बिक्रीका लागि तस्करी गरी ल्याईएको १ लाख ३ सय २० रुपैयाँ मुल्य बराबरको ११ सय ७० केजी प्याज देवानगञ्ज गाउँपालिका ३ का भिम यादवको घरमा परालले छोपी लुकाएर राखेको अवश्थामा बरामद गरिएको हो ।

पछिल्लो समय कप्तानगञ्ज नाका क्षेत्र तस्करीको मुख्य केन्द्रको रुपमा स्थापित हुँदै आएको छ ।

सो क्षेत्रबाट भारततर्फ विराटनगरसम्मका कारोवारीहरुले भारततर्फ मटर, मरिच लगायतका सामग्रीहरु सेटिङमा भारततर्फ पठाउने र राती ठूलो परिमाणमा भारतबाट सामान भित्र्याएर विराटनगरसहित विभिन्न क्षेत्रमा पठाउने गरेको सूचना बेलाबेलामा सार्वजनिक हुँदै आएको छ ।

सदरमुकाम इनरुवामै पनि हरेक दिन जसो विहान साईकलमा लोड गरेर सोही क्षेत्रबाट ठूलो मात्रा प्याजसहित विभिन्न किसिमका सामग्रीहरु आउने गरेको छ ।

कप्तानगञ्जको बीओपी रहेको नाका, त्यसपूर्वको र पश्चिम पाँचोसिमरको नाकाबाट पछिल्लो समयमा सबैभन्दा बढी तस्करीको सामग्री भित्रिने गरेको स्थानीयहरु बताउँछन ।

छोटी भन्सार कार्यालयसमेत रहेको कप्तानगञ्ज सीमा नाकाबाट पछिल्लो समय सीमा वारपार कारोवार गर्नेहरुले भारतबाट ल्याईएका मालसामानहरु सेटिङमा भन्सार शुल्क नबुझाई ल्याउने गरेका छन ।

कप्तानगञ्जमा रहेको सशस्त्र प्रहरी वलको बोर्डर आउट पोष्टको कार्यालय परिषरमै छोटी भन्सार र नेपाल भित्रिने मुख्य बाटो छ ।

त्यही बाटोमा सशस्त्रले चेकपोष्ट नै राखेको छ तर त्यही बाटोबाट विभिन्न सामग्रीहरु भन्सार नकाटी नेपाल भित्र्याउने गरेको स्थानीयहरु बताउँछन ।

स्थानीयहरु घरायसी प्रयोगको लागि सामान ल्याउँदा दुःख दिने तर ठूलो परिमाणमा कारोवारीहरुले ल्याउँदा तैचुप मैचुप बस्ने ब्यवहारले सेटिङमा तस्करीको कारोवार चलिरहेको स्पष्ट भएको दावी गर्छन ।

एक कारोवारी सो सीमा नाकाबाट दैनिक ठुलो परिणाममा कृषिजन्य वस्तुहरु भारतबाट नेपाल भित्र्याउने गरेको जानकारी दिदै लाईन मिलेको सामान सजिलै भित्रिने र लाईन नमिलेको भए मात्रै नियन्त्रणमा लिने गरेको दावी गर्छन ।

लाइन नमिलाई कुनै व्यापारीले भारतीय बजारबाट सामान ल्याउँदा वा लाइन चलाएको सूचना बाहिर चुहावट भए देखावटीका लागि बरामद गरेर भन्सार बुझाउने गरिएको कारोवारीहरु बताउँछन ।

‘अहिले बोर्डरमा रहेका सुरक्षाकर्मीहरुको धन्दा यही छ, कारोवारीसँग कुरा मिले चुपचाप बस्ने, नमिले पक्रेर भन्सार बुझाएर सुराकी कमिसन खाने, उनी भन्छन, ‘सानो परिमाणमा सामान ल्याएर जीविकोपार्जन गर्दै आएकाहरुलाई भन्सार नबुझाई छिर्न दिदैनन् तर टेम्पो, म्याजिक र साना पीकअप भ्यानमा आउनेलाई सोध्दा पनि सोध्दैन ।’