नवराजपुरमा नाचको विषयमा विवाद : जसपाका नेता यादव पक्राउ, सिमा प्रहरी चौकी झाझपट्टि घेराउ

सिमा प्रहरी चौकी झाझपट्टीको प्रहरी टोलीले जसपाका युवा नेता संजीव कुमार यादबलाई पक्राउ गरी आवश्यक कारबाहीका लागि ईलाका प्रहरी कार्यालय महेशपुर पतारीमा बुझाएका छन् । पक्राउ परेका यादबलाई रिहाको माग राख्दै स्थानीयले अहिले सिमा प्रहरी चौकी झाझपट्टी घेराउ गरेका छन् । घेराउ गर्नेहरु प्रशासनको दमनविरुद्ध प्रदर्शन गरिरहेका छन् ।

जनता समाजवादी पार्टी ( जसपा ) का नेता एवम् जसपा नवराजपुर गाउँपालिका का अध्यक्ष शिव उदगार यादब (शिवा) ले प्रहरीले नाच नचाएको भन्दै महिला र बालबालिकालाई घरमा पसेर कुटपिट गरेको आरोप लगाए । उनले नाच कार्यक्रम नै नभएको तर प्रहरीले दमन गर्नुका साथै एक जनालाई पक्राउ गरेपछि सिमा प्रहरी चौकी घेराउ गर्न बाध्य भएको बताए ।

यस्तै जसपाकै नेताहरु जीवछ यादब, बन्सीलाल यादब, शिव उदगार यादब लगायतले पनि प्रहरी दमनको विरोध गरेका छन् । विना कारण पक्राउ गरेको भन्दै युवा नेता संजीवलाई रिहा नगरे कडा आन्दोलन गर्ने चेतावनी समेत दिएका छन् ।

यता, ईलाका प्रहरी कार्यालय महेशपुर पतारीका प्रमुख प्रहरी निरीक्षक अरबिन्द कुमार साहले निषेधाज्ञा जारी भएको बेला नाच नचाएको र त्यहाँ पुग्दा ढुङ्गामुढा गरेकाले नेता यादवलाई पक्राउ गरेको दावी गरे । उनले पक्राउ परेकामाथि अनुसन्धान भइरहेको पनि बताए ।