- काठमाडौं ,भदौ २३ गते मंगलवार ।।
- जनप्रभाब – सम्बादाता
नक्कली प्रेस कार्ड बनाएर बेच्ने गरेको पाइएपछि तीन जनालाई प्रहरीले पक्राउ गरेको छ। महानगरीय प्रहरी अपराध महाशाखाको टोलीले प्रतिगोटा ५ सयको दरले बेच्दै गरेको अवस्थामा तीन जनालाई सोमबार पक्राउ गरेको महाशाखाका एसएसपी दीपक थापाले जानकारी दिनु भयो ।
पक्राउ पर्नेमा बागबजारमा रहेको कालिका प्रिन्टिङका सञ्चालक लक्ष्मण न्यौपानेसहित तीन जना रहेको महाशाखाले जनाएको छ।
नक्कली कार्ड बनाएर राखिएका नक्कली प्रेस कार्ड र प्रेस कार्ड बनाउन प्रयोग गरिने सामनसमेत प्रहरीले बरामद गरेको छ। उनीहरुले विभिन्न अनलाइन मिडियाका नाममा नक्कली प्रेस कार्ड र ज्याकेट बनाएर बेच्ने गरेको प्रहरीले जनाएको छ।
कोरोना भाइरसका कारण जारी निषेधाज्ञामा हिँडडुल गर्न नक्कली प्रेस कार्ड बनाएर बेच्ने गरेको पाइएको हो। रातो मत्स्येन्द्रनाथको जात्रामा प्रहरी र स्थानीयबीच झडप हुँदा प्रेसको ज्याकेट लगाएर प्रहरीमाथि नै ढुंगा हानेको आरोपमा ललितपुर प्रहरीले एक जनालाई पक्राउ गरेको छ। उनी कुनै पनि मिडियामा सम्बद्ध नरहेको प्रहरीले बताएको छ।
फेसबुकबाट तपाईको प्रतिक्रिया !