- काठमाडौं ,भदौ १८ गते बिहीबार ।।
- जनप्रभाब – सम्बादाता
नेपाल कम्युनिष्ट पार्टी(नेकपा)भित्र मत्थर भइसकेको विवाद उपाध्यक्ष वामदेव गौतमले राष्ट्रियसभामा जाने चाहना प्रकट गरेपछि पुनः बल्झिएको छ । प्रधानमन्त्री केपी शर्मा ओली डा. युवराज खतिवडालाई राष्ट्रियसभामा मनोनीत गरी मन्त्रीमा निरन्तरता दिने पक्षमा रहेका छन् ।
तर गौतमले नै राष्ट्रियसभामा जाने इच्छा प्रकट गरेपछि प्रधानमन्त्री ओली धर्मसंकटमा परेका छन् । सचिवालय, स्थायी समितिदेखि केन्द्रीय कमिटी बैठकसम्म अल्पमतमा परेका ओलीलाई प्रधानमन्त्री र पार्टी अध्यक्ष दुवै पदबाट राजीनामा दिन दबाब परेको बेला गौतमले ६ बुँदे प्रस्तावमार्फत् उनलाई साथ दिएका थिए ।गौतमको साथपछि बलियो भएका ओलीको राजीनामाको बिषय ओझेलमा पर्दै गएको थियो । विवाद मिलाउन कार्यदल बनाई त्यसले प्रतिवेदन दिइसकेको अवस्था छ ।
गौतमकी पत्नी तुलसा थापालाई मन्त्री बनाउने गरी उनलाई थामथुम पारी अर्थमन्त्री खतिवडालाई राष्ट्रियसभाको रिक्त एक सिटमा सांसद बनाउने तयारीमा प्रधानमन्त्री थिए । तर एकाएक सोमबार वामदेव गौतमले राष्ट्रियसभामा जाने चाहना राखेपछि ओली अप्ठेरोमा परेका छन् ।
प्रधानमन्त्री ओली खतिवडालाई अर्थमन्त्रीमा निरन्तरता दिने पक्षमा छन् । तर भदौ २१ सम्म सांसद नभए उनको मन्त्रीपद अवैधानिक हुनेछ । तसर्थ प्रधानमन्त्री ओली गौतम र खतिवडा दुवैलाई राष्ट्रियसभामा लानेतर्फ सोच बनाउन थालेको बालुवाटार स्रोतले बताएको छ । स्रोतका अनुसार राष्ट्रियसभाका एक सांसदलाई राजीनामा गराएर गौतम र खतिवडा दुवैलाई राष्ट्रियसभामा लाने तयारीमा उनी पुगेका छन् ।गएको फागुन १४ मा गौतमलाई राष्ट्रियसभामा पठाउने नेकपा सचिवालयको निर्णय कार्यान्वयन नभएपछि पछिल्ला दिनमा आफू सांसदमा नजाने बताउँदैआएका थिए ।
तर एकाएक उनी सांसद हुन लालायित हुनुमा पार्टीभित्रकै शीर्षनेताहरुले अर्थमन्त्री युवराज खतिवडालाई रोक्न वामदेव कार्ड प्रयोग गरेको अनुमान बालुवाटारले गरेको छ । जसका कारण प्रधानमन्त्री ओली तनावमा परेका छन् ।
यदि खतिवडाको राष्ट्रियसभा यात्रा रोकिएमा उनको विकल्पमा वामदेव गौतम वा अरु कुनै होइन, महासचिव बिष्णुप्रसाद पौडेललाई अर्थमन्त्री बनाउने पक्षमा प्रधानमन्त्री ओली रहेको बालुवाटार स्रोतको दाबी छ । तर, भरिसक्य गौतम र खतिवडा दुवैलाई राष्ट्रियसभामा लाने उपायको खोजी भइरहेको छ । जुन उपाय अवलम्बन गर्दा खतिवडालाई मन्त्रीपदमा निरन्तरता दिन सकिन्छ ।
२०७६ फागुन १४ मा नेकपा सचिवलाय बैठकले वामदेव गौतमलाई राष्ट्रियसभाको सांसद बनाउने निर्णय गरेको थियो । तर बैठकमा गौतमको नाम सर्वसम्मत अनुमोदन गरेका प्रधानमन्त्री तथा पार्टी अध्यक्ष केपी शार्मा ओलीले पछि उक्त निर्णय नमान्ने घोषणा गरेका थिए । पछि गौतमले नै राष्ट्रियसभामा नजाने सार्वजनिक रुपमै अभिब्यक्ति दिएका थिए ।
