एसपी राजेन्द्र धमला एक्सनमा उत्रिए ,अवैध कारोबारमा संलग्न दुई जना पक्राउ

जिल्ला प्रहरी कार्यालय सप्तरीका प्रहरी प्रमुख एसपी राजेन्द्र धमलाका अनुसार भारतबाट भन्सार छलि अवैध रुपमा मोटरसाइकलमा बोकेर ल्याउँदै गर्दा बुधबार बिहान १ सय ९० पोका सूर्तीसहित सप्तरीको शम्भुनाथ नगरपालिका ३ निवासी राजदेव साह पक्राउ परेका छन् ।

उनीसँगै रहेका अर्का एक तस्कर भने मोटरसाइकल छाडेर भागेका छन् । गस्तिमा खटेको प्रहरी टोलीले रुपनी गाउँपालिकाको छप्कि भतौल सडकखण्डमा चेक जाँचको क्रममा साहलाई अवैध सूर्तीसहित पक्राउ गरेको हो । घटनास्थलबाट प्रहरीले बा.२२प. ५१६८ तथा प्र.०२–०४१ प.९४६ नम्बरको मोटरसाइकल समेत नियन्त्रणमा लिएको छ ।

यस्तै भारतबाट भन्सार छलेर ल्याएको १ सय ६० थान रेडिमेड कपडासहित राजविराज नगरपालिका १२ का प्रेमप्रसाद यादवलाई प्रहरीले पक्राउ गरेको छ । बुधबारै बिहान जिल्लाको बोदेबसाईन नगरपालिका ८ तथा छिन्नमस्ता गाउँपालिका ४ मा तीन वटा साइकलमा लोड गरि भारततर्फ लैजाँदै गरेको अवस्थामा ६ बोरा हरियो मटर प्रहरीले नियन्त्रणमा लिएको छ ।

प्रहरीलाई देखेर तस्कर साइकल छाडेर भागेको बताइएको छ । अबैध कारोबारमा संलग्न व्यक्तिलाई बरामद सामानसहित बेल्हीस्थित राजविराज भन्सार कार्यालयमा बुझाइएको जिल्ला प्रहरी कार्यालय सप्तरीले जनाएको छ ।