- लहान ,भदौ १४ गते आइतबार ।।
- जनप्रभाब – सम्बादाता
सिरहाको लहान नगरपालिका वडा नम्बर – ५,७ ,१ र ८ स्थितमा रहेको तरकारी बजार ,पुरानो बजार क्षेत्रको फोहोर उठाउने विषयमा लामो समयदेखि चलेको विवाद आज आइतबार अन्त्य भएको हो । जिल्ला प्रशासन कार्यालय सिरहाका प्रमुख जिल्ला अधिकारी ( सिडियो ) प्रदिपराज कणेल , जिल्ला प्रहरी कार्यालय सिरहाका प्रमुख एसपी उमाशंकर पंजियार , सशस्त्र प्रहरी बल सिरहाका प्रमुख एसपी दिपेन्द्र गिरि , राष्ट्रिय अनुसन्धान विभाग सिरहाका प्रमुख एसपी रमेश चन्द्र यादवको पहलमा आईतवारबाट फोहोर उठ्न सुरु भएको हो ।
लहान नगरपालिकाले वडा नम्बर ४ मा फोहोर फाल्ने डम्पिङ साइट बनाएका थिए । तर वडाबासीले त्यहाँ फोहोर फाल्न नदिएपछि लामो समयदेखि विवाद चल्दै आएको थियो । पछिल्लो समय एक महिनादेखि फोहोर नउठ्दा सिरहाको लहान बजार क्षेत्र दुर्गन्धित बनेको थियो ।
तर जिल्ला सुरक्षा समिति सिरहाको पहलमा वडाबासी र लहान नगरपालिकाबीच फोहोर उठाउन दिने विषयमा सहमती बनेको हो । लहान नगरपालिकाका प्रमुख मेयर मुनि साह सुडिका अनुसार खुट्टी र बलान नदी मिल्ने दुमुहानमा फोहोर फाल्ने सहमती भएको छ । सहमतीलगत्तै फोहोर उठ्न थालेको छ ।
लहान नगरपालिकाले बनाएको डम्पिङ साइटमा अब फोहोर फालिने छैन । बस्ती रहेकै क्षेत्रमा डम्पिङ साइट बनाएको र फोहोरको दुर्गन्धले बस्नै नसक्ने अवस्था सृजना हुने भन्दै वडा ४ का अध्यक्ष रामनाथ पण्डित नेतृत्वमै वडाबासीले आन्दोलन गर्दै आएका थिए ।
