- महोत्तरी ,भदौ ७ गते आइतबार ।।
- जनप्रभाब – सम्बादाता
बोक्सीको आरोपमा एक महिलामाथि निर्घात कुटपिट भएको छ । महोत्तरीको सम्सी गाउँपालिका-७ जावद टोलकी ४५ बर्षिया पवनदेवी यादव बोक्सीको आरोपमा कुटिएकी हुन् ।
उनलाई स्थानीय दिनेश यादवलगायत उनका छोराहरु कृष्ण यादव, आशिक यादव, आमा सुजियादेवीले गत शुक्रबार बोक्सी भन्दै कुटपिट गरेका हुन् । निर्घात कुटपिटपछि गम्भीर घाईते यादवलाई जनकपुरस्थित जानकी हेल्थ केयरमा उपचार गराइरहेको पीडितका छोरा सञ्जय यादवले जानकारी दिए ।
सञ्जयले भने, ‘शुक्रबार बेलुका एक्कासि दिनेश यादवको परिवारले मेरो आमामाथि बोक्सीको आरोप लगाउँदै गालीगलौज गरे । म त्यो बेला घरकाहिर थिएँ। लगत्तै म घरमा पुग्दा झगडा भइरहेको थियो । सो समयमा मैले प्रहरीलाई खबर गरेपछि सम्सी प्रहरी चौकीका सई दिपेन्द्र यादवको कमाण्डमा खटिएको प्रहरी टोली घटना स्थलमा पुगेर झगडालाई सामान्य बनाएर फर्के । त्यस पश्चात पुनः तिनीहरु हाम्राे घरमा राति ११-१२ बजेतिर आएर गालीगलैज गर्दै कुटपिट गरे ।’
कुटपिट गर्ने क्रममा पवन देवीको छोरीले लगाएको कपडा पनि उनीहरुले फुकालिदिएको पीडितकी छोरी रुवी यादवले बताइन् । सुरुवाल खोल्नेबित्तिकै रुवी चिच्याएपछि स्थानीयहरु आएर रुवीलाई बचाएका थिए ।
सम्सी प्रहरी चौकीले दोषी कृष्ण यादवलाई पक्राउ गरे पनि प्रहरीमा उजुरी नपरेको हुनाले अनुसन्धानबिना नै हिरासतबाट छोड्न बाध्य भएका थिए । विभिन्न किसिमका दबाब सृजनापछि आरोपी कृष्ण यादवलाई पुनः शनिबार प्रहरीले नियन्त्रणमा लिएको महोत्तरीका एसपी टिका केसीले जानकारी दिए । पीडितको तर्फबाट हालसम्म प्रहरीमा जाहेरी नआउँदा कानुनी कारवाही प्रक्रिया अगाडि बढन् नसकेको एसपी केसीले जानकारी दिए ।
