• विराटनगर ,भदौ २ गते मंगलवार ।।
• जनप्रभाब-सम्बादाता

प्रधानमन्त्री केपी शर्मा ओलीले ‘बेसारपानी खाएर एक दुईपटक हाच्छिउँ ग¥यो कोरोना ठीक भइहाल्छ नि !’ भनि दिएको अभिब्यक्तिलाई लिएर चर्को आलोचना भएपनि अहिले प्रदेश १ का विभिन्न स्थानीय तहहरुले तयार पारेका आईसोलेसनहरुमा भने प्रधानमन्त्रीको सिफारिसलाई संक्रमितहरुको खानाको मेन्यू बनाएका छन ।
प्रदेश सरकारले बनाएको आइसोलेसन सेन्टर र कोभिड १९ उपचार केन्द्रहरूमा बेड खाली नभएर होम आइसोलेसनमै बसिरहेकाहरुको लागि प्रदेश १ को राजधानी विराटनगर र इटहरी उपमहानगरपालिकाले जारी गरेको ध्यान दिनपर्ने विषय र खाना तथा औषधिबारे दैनिक कार्ययोजनामा बेसारपानी र काढापानीलाई समेत मेन्यूमा समावेश गरेका छन ।
महानगरले नगरवासीलाई दिएको खानाको मेन्युमा ‘तातो बेसार पानी’ पनि छ । विराटनगर महानगरपालिका मात्र नभएर होम आइसोलेसनमा बस्नका लागि इटहरी अस्पतालले पनि खानपिन तथा औषधिको कार्ययोजना प्रस्तुत गरेको छ । डा. मनीष शर्माद्वारा प्रस्तुत गरिएको होम आइसोलेसनमा निर्देशिकामा तातो दूधमा बेसार, कागती पानी योग, काढापानी र पानीको बाफ लिने विषयवस्तु पनि समेटिएको छ ।
कोरोना संक्रमतिको संख्या बढेसँगै अस्पताल खचाखच भएका छन् । सरकारले तोकेका आइसोलेसन सेन्टर पनि भरिभराउ छन् । पछिल्लो समय विराटनगरमा संक्रमति थपिने क्रम बढेसँगै होम आइसोलेसनमा बस्नेहरूको संख्या हरेक दिन थपिँदो छ । विराटनगर महानगरपालिकाका मेयर भीम पराजुलीले महानगरले परम्परागत औषधिजन्य जडीबुटीको प्रयोगमा समेत जोड दिएको बताएका छन् ।
उनले भने,‘हाम्रो जनस्वास्थ्य महाशाखाका चिकित्सकहरूको सरसल्लाह र छलफलले निर्णय गरेर नै होम आइसोलेसनमा बस्नेहरूका लागि निर्देशिका तयार गरिएको हो ।’ महानगरका आइसोलेसनमा बस्नेका लागि पनि यही निर्देशिकाअनुसार संक्रमितले दिनचर्या बिताइरहेको पराजुलीले सुनाए ।
विराटनगर महानगरपालिकाले होम आइसोलेसनमा बस्नेका लागि २१ बुँदे निर्देशिका जारी गरेको छ । जसमा बिहान उठेर योगाभ्यासबाट दैनिकी आरम्भ हुन्छ । ६ बजे उठ्ने आधा घण्टा योग गर्ने, त्यसपछि तातो कागती पानी लिने, बिहान ८ बजेसम्म नास्ता खाने र त्यसपछि मनतातो दूधमा बेसार हालेर पिउने उल्लेख छ ।
महानगरले साढे १० बजे बिहान होम आइसोलेसनमा बस्नेहरूलाई तातोपानीमा बेसारसहित अदुवा, मरिचजस्ता जडीबुटीको मिश्रण सेवन गर्न सुझाव दिएको छ । राति साढे ९ बजे पनि त्यस्तै मिश्रण सेवन गर्न भनिएको छ । योबाहेक भिटामिन सी तथा डीको सेवन गर्नसमेत सल्लाह दिइएको छ ।
महानगरले व्यवस्थापन गरेका आइसोलेसन सेन्टरहरूमा खानालगायत सबै व्यवस्थापन महानगरका तर्फबाट भए पनि घरमा बस्नेहरूले भने त्यस्ता चिजबिजको आफैं व्यवस्थापन गर्नुपर्छ । विराटनगर महानगरपालिकाले विराटनगर १९ को इलाका स्वास्थ्य कार्यालय र विराटनगरको मारवाडी सेवा समितिको भवनमा आइसोलेसन सञ्चालन गरी कोरोना संक्रमितलाई उपचारका लागि राखिएको छ । महानगरमा संक्रमितको संख्या ५६६ जना पुगिसकेका छन् । ७ जनाको मृत्यु भएको छ ।