- सुनसरी,साउन २१ गते बुधबार ।।
- जनप्रभाब-सम्बादाता
जिल्ला प्रहरी कार्यालय सुनसरीमा कार्यरत एक प्रहरी जवान र एक थुनावामा कोरोना संक्रमणको पुष्टि भएको छ ।
कार्यालय हाताभित्र चमेना गृह सञ्चालन गरिरहेका प्रहरी जवानमा कोरोना संक्रमण पुष्टि भएको हो । उनी परिवारसहित प्रहरी कार्यालय हातामै बस्दै आएका थिए ।
जिल्ला प्रहरी कार्यालयभित्रका शाखाहरुमा उनकै चमेना गृहबाट चिया खाजा जाने र प्रहरी कर्मचारीहरु पनि चमेना गृहमै गएर चिया खाजा खाने गरेका थिए ।
कार्यालयका प्रायः हरेक कर्मचारीहरुसँग उनको सम्पर्क हुने भएकोले अहिले प्रहरीभित्र चिन्ता बढेको छ ।
गत विहीबार जिल्ला प्रहरी कार्यालयका प्रमुख एसपीसहित ३० जनाको स्वाव परिक्षण गरिएकोमा ति जवानको मात्रै संक्रमण पुष्टि भएको प्रहरी उपरिक्षक कमल थापाले जानकारी दिए । उनका अनुसार इलाका प्रहरी कार्यालयमा रहेका एक थुनुवामा कोरोना देखिएको हो ।
स्रोतका अनुसार ति थुनुवा केही दिन अघि इनरुवाबाटै इटहरी लगिएका हुन । जसका कारण उनीसँगै इनरुवा र इटहरीमा थुनामा रहेका अन्य थुनुवाहरुमा समेत संक्रमणको जेखिम बढेको छ ।
एसपी थापाले ति जवानसँग सम्पर्कमा आएका अरुको पहिचान गरी उनीहरुलाई जिल्ला प्रहरी कार्यालय हाताभित्रै रहेको भवनमा अलग्गै क्वारेन्टिन गरिने तयारी भईरहेको बताए ।
उनीहरुलाई ड्यूटीमा नखटाई बाँकी प्रहरी कर्मचारीलाई मात्रै ड्यूटीमा खटाउने तयारी भईरहेको एसपी थापाले जानकारी दिए । जिल्ला स्वास्थ्य कार्यालयले ति जवानको कन्ट्याक्ट ट्रेसिङ गरेर थप प्रहरीको स्वाव संकलनको तयारी थालेको छ ।
स्वास्थ्य प्रमुख सागर प्रसाईले कन्ट्याक्ट टे«ेसिङको काम थालिएको र थप ४० जनाको स्वाव संकलनको तयारी भईरहेको जानकारी दिए । कोरोना संक्रमण देखिएका प्रहरी जवानलाई आईसोलेसनमा पठाईसकिएको र कन्ट्याक्ट ट्रेसिङको काम पनि भईरहेको बताईएको छ ।
सो चमेना गृहमा इनरुवासहित जिल्लाका विभिन्न स्थानीय तहहरुबाट सेवा लिन आउनेहरुले समेत खाजा चिया खाने भएकोले इनरुवा क्षेत्रमा कोरोना संक्रमणको सम्भावनालाई लिएर त्रास बढेको छ ।
यसअघि पनि प्रदेश प्रहरी कार्यालय विराटनगरमा कार्यरत इनरुवा ३ घर भएका एक प्रहरी हवल्दारमा कोरोनाको संक्रमण देखिएको थियो । जसका कारण इनरुवामा कन्ट्याक्ट टे«सिङ गरेर ४१ जनाको परिक्षण गरिएको थियो ।
इनरुवा नगरपालिकाले नगरक्षेत्रमा अल्पकालिन लकडाउन नै लगाएको थियो । जसमा सबैको परिणाम नेगेटिभ देखिएको पछि आंशिक रुपमा बजार खोलिएको थियो ।
