- सप्तरी,साउन १० गते सनिवार ।।
- जनप्रभाब-सम्बादाता
सशस्त्र प्रहरी बल ६ नम्बर गणका एसपी उद्धव न्यौपानेले घुमुवाका रूपमा परिचालन गरेका वरिष्ठ हवल्दार राजकुमार यादव र अर्का प्रहरी जवान वीरेन्द्र साहले गरेको गैरकानुनी कार्य र नाकाबाट भएको तस्करीधन्दाका बारेमा सशस्त्रको मुख्यालय र गृहमन्त्रालयमा समेत उजुर परेपछि छानविन हुने डरले एसपी न्यौपानेले वरिष्ठ हवल्दार यादवलाई दरबन्दीमा रमाना गरेका छन् ।
यादवको दरबन्दी सिराहा गणमा रहेको थियो । तर, एसपी न्यौपानेले यादव र वीरेन्द्र साहलाई घुमुवाका रूपमा परिचालन गर्दै आएका थिए । यिनै घुमुवाहरूको सेटिङमा कुनौली नाकाबाट ठूलो मात्रामा तस्करी हुँदै आएको कुरा समेत उजुरीमा परेपछि मुख्यालयले आवश्यक छानविनका लागि २ नम्बर प्रदेशस्थित बाहिनीलाई निर्देशन दिएको थियो । तर बाहिनीमा तत्कालीन डिआइजी राजु अर्यालको सरुवा भएको र केवी ब्रह्माचार्य हाजिर नभइसकेका कारण केही दिन अनुसन्धान रोकिए पनि ब्रह्माचार्य बुधवार हाजिर भएका छन् । उनले यस विषयमा छानविन गर्छन्–गर्दैनन् त्यो हेर्न बाँकी नै छ तर एसपी न्यौपानेले यादवलाई भने दरबन्दीमा रमाना गराएका छन् । भारतीय सीमा क्षेत्र सिल गरिएको भनिए पनि सप्तरीको कुनौली नाका क्षेत्रबाट ठूलो मात्रामा संगठित तस्करी हुने गरेको पाइएको छ । ६ नम्बर गणका एसपी उद्धव न्यौपानेले परिचालन गरेका घुमुवाहरूले खुलेयाम तस्करीको लाइन दिएका छन् ।
एसपी न्यौपानेले घुमुवाको रूपमा वरिष्ठ हवल्दार राजकुमार यादव र वीरेन्द्र साह सिपाहीलाई परिचालन गरेका छन् । यी घुमुवाहरूले कुनौली नाकाबाट तस्करी गर्न छोटु साह, बलराम साह, वरूण यादव, रोशन यादवलगायतकालाई तस्करीको लाइन दिएका छन् । तस्करहरूले भारतबाट लत्ताकपडा, हार्डवेयर तेल, चिनी, कस्मेटिक, मोटर पार्टस्को ठूलो मात्रामा तस्करी गरी नेपाल भित्र्याउने गरेका छन् भने नेपालबाट केराउ, मरिच, छोहडाको तस्करी गर्दै आएका छन् ।
यी घुमुवाहरूले बाहिनीमा समेत रकम दिनुपर्ने भन्दै तस्करहरूसँग रकम असुलेको उजुरी परेको थियो । एसपी न्यौपाने यसअघि पनि विवादमा तानिएका थिए । सशस्त्र प्रहरीले तस्करीको लाइन चलाएको, महिलाहरूमाथि अभद्र व्यवहार गरेको देखि अनेकन घटनाहरू न्यौपानेकै पालामा सप्तरीमा भएका थिए । गोरखाबासी भएकै कारण पूर्वप्रधानमन्त्री बाबुराम भट्टराईका तत्कालीन पिए फणीन्द्र देवकोटा समकक्षी भएकै कारण त्यही राजनीतिक पहुँचका आधारमा उनी एसपी बढुवा हुँदा पनि निकै माथि तानिएका थिए ।
त्यसो त डिएसपी हुँदा सशस्त्र प्रहरीका डिएसपीहरूका लागि सबैभन्दा बढी आकर्षक ठाउँका रूपमा चिनिने निर्वाचन आयोग परिसरमा रहेको बाघभैरव गुल्ममा समेत उद्धव न्यौपाने बस्न सफल भएका थिए । अमेरिकन र बेलायती दूतावासमा यसै गुल्मबाट सुरक्षाको प्रबन्ध मिलाइएको हुन्छ । यसरी सुरक्षा व्यवस्था मिलाएवापत ती दूतावासहरूले भत्ता दिने गर्दछन् । जसका कारण ड्युटी खटाउँदासमेत त्यहाँ आर्थिक चलखेल हुने गरेको कुरा बाहिर निस्कने गर्दछ । एसपी न्यौपानेले घुमुवाहरूलाई रमाना गरे पनि उक्त नाकाहरूबाट हुने तस्करी भने अझै रोकिएको छैन ।
