- काठमाडौं ,असार २५ गते बिहिवार ।
- जन प्रभाब-आलोक यादव
नवनियुक्त प्रहरी महानिरीक्षक (IGP) शैलेश थापा क्षत्रीले प्रहरी संघठनका निम्ति निस्वार्थ काम गर्ने प्रतिबद्धता व्यक्त गरेका छन् ।
आज बिहीबार पदभार ग्रहण गर्दै प्रहरी माहानिरीक्षक थापाले सरकारको निर्देशनअनुसार नै प्रहरी संगठनलाई साथमा लिएर खरो उत्रिने बताएका छन् ।
‘ऐन नियम र निर्दिस्ट गरेको सेवा भित्र रहेर नेपाल सरकार तालुक गृहमन्त्रालयको निर्देशनमा सिंगो प्रहरी संगठनलाई साथमा लिएर आफ्नो क्षमता र विवेकले भ्याएसम्म निस्वार्थ रुपमा यहाँहरुको सेवामा खरो उत्रिने इमान्दार प्रयास मेरो हुनेछ’, उनले भने ।
त्यस्तै आईजीपी थापाले आफू एक्लैले सबै अपेक्षा पूरा गर्न नसक्ने भन्दै सबैको साथ र सहयोग आवश्यक रहेको बताएका छन् ।
‘प्रहरी महानिरीक्षक एक्लैले सबै अपेक्षाहरु पूरा गर्न सक्दैन । मेरो सफलता वा असफलता भनेको यिनै कुराहरुको समायोजन कसरी गर्ने भन्नेमा निर्भर गर्छ भन्ने लाग्छ र म मेरो पुरा तागत यसमा लगाउने वाचा गर्दछु । यसका लागि उचित निर्देशन भरपर्दो सहयोगी र स्वच्छ आलोचकको आवश्यकता पर्दछ’, उनले भने ।
त्यस्तै उनले प्रहरी संगठनलाई आधुनिक प्रविधि र आधुनिकतामा अगाडि बढाउने प्रतिबद्धता पनि व्यक्त गरेका छन् । ‘मेरो असफलता र असफलता भनेको यी नै कुराहरुको समायोजना कसरी गर्ने भन्नेमा नै निर्भर गर्दछ । आधुनिक प्रविधि र आधुनिकतामा प्रहरीलाई अगाडि बढाउने प्रयत्न हुनेछ । आगामी दिनहरुमा प्रहरी संगठनलाई व्यत्तिगत लहडमा होइन संस्थागत निर्णयमा अगाडि बढाउँछु’, उनले भने, ‘हामी कानुन कार्यान्वयन गर्ने निकाय हौं, कानुन उलंघन गर्ने निकायको रुपमा रुपान्तरण हुन कुनै पनि हालतमा हुँदैन्, कसैले पनि बर्दीमा दाग लगाउने कोशिश गर्छ भने उसमाथि निर्मम रुपमा कारवाही प्रक्रिया अगाडि बढाइन्छ ।’
कार्यक्रममा गृह मन्त्रालयका उच्चपदस्थ अधिकारीहरु, नेपाल प्रहरी तथा सशस्त्र प्रहरी बल नेपालका उच्च प्रहरी अधिकृतहरु, राष्ट्रिय अनुसन्धान विभागका उच्चपदस्थ कर्मचारी एवं संचारकर्मीहरुको उपस्थिति रहेको थियो ।
दर्ज्यानी चिन्हद्वारा सुशोभित भएपश्चात नवनियुक्त प्रहरी महानिरीक्षक थापा क्षेत्रीले बिहीबारै आफ्नो कार्यकक्षमा पदबहाली गरेका छन् । प्रहरी महानिरीक्षक थापा क्षेत्री प्रहरी प्रधान कार्यालय प्रवेश गर्दै प्रहरी अतिरिक्त महानिरीक्षकद्वय डा. आशा सिंह र हरि बहादुर पाल, प्रहरी नायव महानिरीक्षकहरु, वरिष्ठ प्रहरी अधिकृत तथा जवानहरुले हार्दिक स्वागत गरे ।
प्रहरी महानिरीक्षक थापा क्षेत्रीले प्रहरी प्रधान कार्यालय परिसरस्थित अमर प्रहरी स्मारकमा पुष्पहार चढाई अमर प्रहरीप्रति श्रद्धाञ्जली अर्पण गर्नुको साथै प्रहरी प्रधान कार्यालय परिसरमा वृक्षारोपण समेत गरे ।
विसं २०२५ मंसिर २३ गते भक्तपुर सूर्यविनायक नगरपालिका(५ मा जन्मनु भएका प्रहरी महानिरीक्षक थापा क्षेत्री २०४९ वैशाख १९ गते प्रहरी निरीक्षक पदबाट नेपाल प्रहरी सेवा प्रवेश गरेका थिए । प्रहरी महानिरीक्षक थापा क्षेत्री २०५८ फागुन १० गते प्रहरी नायव उपरीक्षक, २०६७ पुस २० गते प्रहरी उपरीक्षक, २०७४ साउन १९ गते प्रहरी वरिष्ठ उपरीक्षक, २०७५ असोज २८ गते प्रहरी नायब महानिरीक्षक,२०७६ चैत ९ गते प्रहरी अतिरिक्त महानिरीक्षक पदमा पदोन्नति भएका थिए ।
राजनीतिशास्त्रमा स्नातकोत्तर गरेका प्रहरी महानिरीक्षक थापा क्षेत्रीले कमाण्ड र स्टाफ कोर्ष, लिडरसिप एण्ड म्यानेजमेन्ट ट्रेनिङ प्रोग्राम लगायत विभिन्न १७ वटा राष्ट्रिय तथा अन्तर्राष्ट्रिय तालिम हासिल गरेका छन् । प्रहरी महानिरीक्षक थापा क्षेत्री दुर्गम सेवा पदक, दैवीप्रकोप पिडीतोद्वार पदक, गद्दी आरोहण रजत पदक, प्रसिद्ध सेवा पदक, वीरेन्द्र ऐश्वर्य सेवा पदक, प्रहरी सेवा पदक, गोरखा दक्षिणबाहु चौथो लगायतका विभूषणबाट विभूषित भएका छन् । यसैगरी उनले उत्कृष्ट व्यावसायिक कार्य सम्पादन गरेबापत ग्रेड थप तथा दर्जनौं नगद पुरस्कार प्राप्त गर्नुको साथै विभिन्न प्रशंसापत्र एवम् कदरपत्रद्वारा सम्मानित भएका छन् ।
