• पर्सा,असार २२ गते सोमबार ।
• जन प्रभाब-सम्बादाता

वीरगञ्जको वडा नं. २४ मा पर्ने सिर्सिया-रामगढवा सडक वीरगञ्ज बजारलाई ग्रामिण क्षेत्रसँग जोड्ने मुख्य सडकको रुपमा प्रयोग हुँदै आएको छ । ग्रामिण क्षेत्रसँग जोडिएका कारण दैनिक यस क्षेत्र मार्फत सयौँको सङ्ख्यामा व्यक्तिहरु आवात जावत समेत गर्ने गरेका छन् ।

तर, पछिल्लो केहि समय यता सडक प्रयोग गर्नेहरुको सङ्ख्या कम भएको छ । कारण हो सडकको जिर्ण अवस्था र मौसम अनुसार यात्रुहरुलाई खेप्नुपर्ने सास्ती । गर्मिको मौसममा सडकमा उडेको धुलोले केहि नदेख्ने अवस्था सृजना हुन्छ भने वर्षायाममा हिलो र पानि जमेर हिड्नै नसक्ने नौवत् आउँछ ।

सडकमा हुने यस्ता सम्पूर्ण समस्याको जड हो समयमा सडक निर्माणको कार्य नगर्ने ठेक्का कम्पनि । बैशाख २०७५ मा ठेक्का लिएर २ वर्ष भित्र निर्माणको काम सम्पन्न गर्ने जिम्मा लिएको रमण-श्यामसुन्दर-महावीर जेवी कन्स्ट्रक्सनले समयमा सडकको काम सम्पन्न नगर्दा स्थानीय र आवत-जावत गर्ने व्यक्तिहरुलाई सास्ती खेप्नुपरेको छ ।

दुई वर्ष भित्र निर्माण सम्पन्न हुनेगरी २०७५ बैशाखमा ठेक्का लिएको रमण-श्यामसुन्दर-महावीर जेवी कन्स्ट्रक्सनले हालसम्म उक्त सडकको केहि प्रतिसत काम समेत सम्पन्न गर्न सकेको छैन । सघन शहरी तथा भवन निर्माण कार्यालय पर्सा मार्फत ठेक्का सकारेको कन्स्ट्रक्सन कम्पनिले हालसम्म गरेको काम समेत गुणस्तरहिन भएको स्थानीयहरुको गुनासो छ ।

सडकको दुवै तर्फ बनेको नालामा कमसल सामग्री प्रयोग गरिएको स्थानीय पारस नाथ सिंह राजपुतले गुनासो गरे । उनले नाला निर्माण मापदण्ड नभएको बताउँदै ठाउँ-ठाउँमा पानि निकासका लागि निर्माण गरिनुपर्ने कल्भर्ट समेत नबनाइएको बताए ।

कल्भर्ट निर्माण नहुँदा उत्तर भागमा रहेको बस्ति वर्षायाममा डुबानमा पर्न सक्ने भय रहेको राजपुतले बताए । ‘सिर्सिया नदिमा पानिको सतह माथि उठ्दा सडकको उत्तर भागमा रहेको बस्तिमा पानि लाग्ने गरेको छ, पहिला कल्भर्ट थियो अनि पानि निकास हुन्थ्यो,’ राजपुतले बताउँदै प्रश्न गरे, ‘तर, अहिले सडक निर्माण हुँदा कहीं कल्भर्ट बनाइएको छैन, अब भन्नुस उता जमेको पानि निकास नहुँदा त्यो बस्ति डुबानमा पर्दैन?’

सोहि सडकमा सिमेन्ट छडको पसल सञ्चालन गरेर बसेका लक्ष्मण सर्राफ भन्छन सडकको काम समयमा सम्पन्न नहुँदा आफुहरुलाई व्यपार व्यवसायमा समेत घाटा खेप्नु परेको छ । ‘पसल थापेर त् बसेका छौँ, तर सामान किन्न आउँने ग्राहक छैन,’ साझा डेलीसँग कुरा गर्दै सर्राफले भने, ‘लाखौँको लगानी लगाएर मासिक किराय मात्र तिर्दै छौँ किनभने बाटो राम्रो नभएर हाम्रो ग्राहक वैकल्पिकबाट प्रयोग गर्दै अन्त्यबाट खरिद गर्छन ।’

सोहि वडाका स्थानीय जितेन्द्र शर्माले सडकको जिर्ण अवस्थाका कारण दैनिक दुर्घटना हुने गरेको बताए । उनले सडकमा पानि जम्दा खाल्डा खुल्डीहरुमा परेर दुर्घटना हुनु सामान्य भइसकेको बताउँदै दु:ख व्यक्त गरे । ‘सडकमा दैनिक दुर्घटना हुन्छ, खाल्डा खुल्डीहरुमा लडेर सधै कोहि न कोहि दुर्घटनामा परिरहेको हुन्छ, दुर्घटना हुनु त् अब हामीलाई सामान्य लाग्न थालि सक्यो,’ शर्माले बताए, ‘अहिले सम्म कुनै ठुलो दुर्घटना नभएपनि भविष्यमा कसैको ज्यान जानेगरी दुर्घटना हुँदैन भनेर भन्नै सकिंदैन ।’

यता परियोजनाका इन्जिनियर अमरेन्द्र झाले साइट क्लियर नहुँदा सडक निर्माणमा समस्या भएको बताए । उनले सडक बनाउँनु भन्दा अगावै नाला निर्माण गर्नुपर्ने हुन्छ तर विभिन्न विवादका कारण नाला निर्माणनै ढिलो हुँदा सडकमा ढिलाई भएको स्वीकारे ।

‘नाला निर्माण नगरेसम्म सडकको काम अगाडी बढाउँन मिल्दैन,’ परियोजनाका इन्जिनियर अमरेन्द्र झाले भने, ‘नाला निर्माण गर्दा धेरै विवाद आउँछ, साईट क्लियर नभएसम्म हामीले काम अगाडी बढाउँनै मिल्दैन, हामी विवादहरुको निकास खोज्दै काम अगाडी बधाईरहेका छौँ ।’

उनले कोभिडले गर्दा पनि सडक निर्माणमा ढिलाई भएको बताए । ‘हामीले वीरगञ्जमा यस्तै १३ वटा सडक बनाईरहेका छौँ, सबैको काम द्रुत गतिमा चलिरहेको थियो तर कोभिडले गर्दा काम ठप्प हुँदा हामीले अपेक्षित रुपमा काम गर्न सकेनौं,’ इनिजियर झाले बताए ।