- काठमाडौं ,असार २२ गते सोमबार ।
- जन प्रभाब-सम्बादाता
सशस्त्र प्रहरी महानिरीक्षक शैलेन्द्र खनालले राष्ट्र र जनताको हितमा कार्य गर्न मातहत प्रहरी कमान्डरहरूलाई निर्देशन दिएका छन्।आइतबार हलचोकस्थित प्रधान कार्यालयमा कार्यरत सिनियर अधिकृत तथा उपत्यकामा कार्यरत कमान्डरहरूलाई निर्देशन दिँदै महानिरीक्षक खनालले राष्ट्र¸ जनता र संगठनको अहितमा काम गर्ने छुट कसैलाई नभएको स्मरण गराएका हुन्।
संगठन स्थापनाको स्मरण गराउँदै महानिरीक्षक खनालले संगठनका सयौं कर्मचारीको बलिदानबाट प्राप्त सफलतालाई व्यक्तिगत स्वार्थ र हितमा प्रयोग नगर्न निर्देशन दिए।
संगठनको अनर्गल प्रचार गर्न केही व्यक्ति संलग्न भएको तर्फ इंगित गर्दै महानिरीक्षक खनालले आफ्नो जिम्मेवारी र दायित्व पूरा नगर्नेले संगठनसँग जोडिएर बस्नुको अर्थ नहुने बताए। राष्ट्र र जनताप्रतिको कर्तव्य सत्विचारका साथ सत्कर्ममा लागि सत्मार्गमा हिँडेर सत्धर्म निभाउन उनको निर्देशन थियो।
कर्मचारीहरुको वृत्तिविकासलाई ध्यानमा राखी कुनैपनि कर्मचारीलाई अन्याय हुन नदिने दृढता व्यक्त गर्दै महानिरीक्षक खनालले संगठनभित्रको समस्या आपसी छलफलबाट नै समाधान हुने बाह्य दबाब दिन खोजे स्वीकार्य नहुने चेतावनी समेत दिए।
‘नेतृत्वलाई संगठनको चिन्ता छ। संगठनले मुलुकको प्रत्येक चुनौतीलाई सामना गर्दै अघि बढिरहेको छ। त्यसैले प्रत्येक कर्मचारीले प्राप्त जिम्मेवारी र उत्तरदायित्वलाई अनुशासित व्यवसायिक र इमानदारिता पूर्वक सही ढंगले पुरा गर्नुपर्छ,’ महानिरीक्षक खनालले भने, ‘व्यक्तिले गरेको बद्नामीको भार संगठनले बोक्न बाध्य हुँदैन।’ महानिरीक्षक खनालले ‘म होइन, हामी’ भनेर सोच्न र राष्ट्रप्रतिको कर्तव्यलाई सम्झी व्यक्तिगत स्वार्थ थाती राखेर काम गर्न निर्देशन गरे।
मानवश्रोत विभाग प्रमुख सशस्त्र प्रहरी अतिरिक्त महानिरीक्षक पुष्पराम केसीले चेन अफ कमान्डमा चल्न र उच्च अनुशासित भएर कार्य गर्न मातहतका कर्मचारीलाई आग्रह गरे।
यसै गरी सशस्त्र प्रहरी बल प्रशिक्षण प्रतिष्ठानका कार्यकारी निर्देशक सशस्त्र प्रहरी अतिरिक्त महानिरीक्षक नारायणबाबु थापाले संगठनको नेतृत्वपङ्ति एक ढिक्का भएर अघि बढेकोले आफ्नो जिम्मेवारीमा उच्च दक्षताका साथ लाग्न आग्रह गरे।
कार्य तथा सीमा सुरक्षा विभाग प्रमुख सशस्त्र प्रहरी अतिरिक्त महानिरीक्षक रामशरण पौडेलले फिल्डमा खटिएका कर्मचारीको उच्च प्रशंसा गरेका थिए। जस्तोसुकै चुनौतीको सामना गर्न र आगामी दिनमा हुन सक्ने विपद्को लागि समेत तयारी अवस्थामा रहन पनि उनको निर्देशन थियो।
फेसबुकबाट तपाईको प्रतिक्रिया !