- काठमाडौं ,असार १९ गते शुक्रबार ।
महानगरीय प्रहरी कार्यालयले मातहतका बृत्त र प्रभागमा कार्यरत उत्कृष्ट तीन प्रहरीलाई पुरस्कृत गरेको हो ।
भक्तपुरको चाँगुनारायणमा घाँस काट्दै गरेकी महिलालाई खुकुरी देखाएर उनको कान नै च्यातिनेगरी २ तोलाको गहना लुटेर भागेका दुई लुटेरालाई मेट्रो कन्ट्रोलको सेटबाट आएको सूचनाकै आधारमा असार १२ गते साखु प्रहरीले चारैतर्फ घेरा हालेर पक्राउ गरेको थियो ।
प्रहरीले काठमाडौं संखरापुर नगरपालिका ७ बाट लुटेरा पक्राउ गर्न सफल भएको थियो । लुटेरा पक्राउका साथै प्रहरीले महिलाको लुटिएको गहना पनि फेला पार्न सफल भएको थियो ।
घटना भएको स्थानभन्दा करिब १० किलोमिटर टाढा पुगेपश्चात् साँखु प्रहरीले लुटेरा पक्राउ गर्न सफल भएकोमा प्रहरीको जनस्तरमा व्यापक प्रशंसा भएको थियो । प्रहरीले चाहेमा अपराधी प्रहरीबाट उम्कन सक्दैन भन्ने समेत स्थापित भएको थियो । उक्त कार्यमा साँखुका प्रहरी निरीक्षक गोविन्द पन्थीले द्रुतगतिमा प्रहरी परिचालन गर्दै स्वयम् फिल्डमा खटिदा त्यो सफलता प्राप्त भएको भनी स्थानीयबाट समेत उनको प्रशंसा भएको थियो ।
महानगरीय प्रहरी कार्यालयले शुक्रबार प्रहरी बृत्त दरबारमार्गका डीएसपी रन्जनकुमार दाहाल, साँखु प्रभागका इन्स्पेक्टर गोविन्द पन्थी र प्रहरी हवलदार शिवप्रसाद दाहाललाई उपत्यकाको शान्ति सुरक्षा, अपराध अनुसन्धान, रोकथाम, नियन्त्रण, प्रहरी परिचालन तथा कोरोना भाइरस रोकथामतर्फको कार्यमा परिणाममुखी प्रहरी सेवा प्रदान गरेकोमा पुरस्कृत गरेको छ ।
आफ्नो पेशाप्रति समर्पित भई उत्कृष्ट ढंगबाट कार्यसम्पादन गरेकोमा यस्तो उत्कृष्ट कार्य गर्ने कर्मचारीलाई पुरस्कृत गरिदा अन्य प्रहरी कर्मचारीमा समेत सकारात्मक सन्देश प्रवाह हुने भन्दै महानगरीय प्रहरी कार्यलय रानिपोखरीले तीनै जनालाई उत्कृष्ट भन्दै नगद द्वारा उक्त कार्यालयको २०७७ असार १६ को निर्णय अनुसार पुरस्कार प्रदान गरेको छ ।
