- सिरहा ,असार १६ गते मंगलवार ।
- जन प्रभाव – सम्बादाता
सिरहा जिल्लाको सिरहा नगरपालिका वडा नम्बर -१४ स्थित खिरौनास्थित कुलोको डिलमा सशस्त्र प्रहरी बलका एक जवान मृत अवस्थामा फेला परेका छन् । भन्सार कार्यालय माडरसँगै रहेको बोर्डर आउट पोस्टमा कार्यरत सशस्त्र प्रहरीका जवान मनोहरकुमार यादव कुलोको डिलमा मृत अवस्थामा आज फेला परेका हुन् ।
महोत्तरीको सोनमा गाउँपालिका वडा नम्बर –३ घर भई माडरमा खटिएका मृतक यादव सोमबारदेखि नै बोर्डर आउट पोष्टको सम्पर्कभन्दा बाहिर हुनुहुन्थ्यो । मृतक यादवको शव आज दिउँसो १ बजे फेला परेको जिल्ला प्रहरी कार्यालय सिरहाका प्रवक्ता एवम् प्रहरी नायव उपरीक्षक ( डिएसपी ) विनोद घिमिरेले जानकारी दिए ।
मृतकको शवको प्रकृति हेर्दा यादवको हत्या भएको देखिएको र उक्त हत्याको अनुसन्धान गर्न जिल्ला प्रहरी कार्यालय र सशस्त्र प्रहरी बल नेपाल ७ नंं गण हेडक्वार्टर सिरहाको संयुक्त टोली घटनास्थलमै रहेको डिएसपी घिमिरेले बताउनुभयो ।
