- काठमाडौँ,असार १४ गते आइतबार ।
लकडाउनका समयमा पनि अख्तियार दुरूपयोग अनुसन्धान आयोगका कर्मचारीहरू भने आफ्नो काममा क्रियाशील रहिरहेका थिए । पूर्ण लकडाउन रहँदा पनि अख्तियारले आफ्नो नियमित काम स्ट्रिङ अप्रेसनदेखि मुद्दाका अनुसन्धानहरू गरिरहेको थियो । जसका कारण घुस लिनेहरू स्ट्रिङ अप्रेसनमा पक्राउ परिरहेका थिए भने अख्तियारले मुद्दासमेत अदालतमा बुझाइरहेको थियो । लकडाउन केही खुकुलो भएपछि आयोगको काम झन् तीव्र गतिमा भइरहेको देखिन्छ । मंगलवारमात्र सर्लाहीको हरिपुर नगर कार्यपालिकाको कार्यालयका लेखा अधिकृत र लेखापाल घुससहित पक्राउ परेका छन् । लेखा अधिकृत भुपेन्द्रकुमार सिंह र लेखापाल रन्जितकुमार राय यादवलाई अख्तियारको टोलीले चार हजार रूपैयाँसहित पक्राउ गरेको हो ।
विज्ञान प्रकाशनवापतको भुक्तानी दिने क्रममा सेवाग्राहीसँग घुस माग गरिरहेको सूचना एवम् उजुरीका आधारमा बर्दिवासबाट खटिएको अख्तियारको टोलीले उनीहरूलाई पक्राउ गरेको हो ।
यसैबीच सवारी पास बनाइदिन्छु भनेर समेत काठमाडौँ घुस लिने काम हुने गरेको कुरा उजागर भएको छ । जिल्ला प्रशासन कार्यालयमा लेखापढीको काम गर्दै आएका बिचौलियाले यसरी घुुस लिएको कुरा अख्तियारको स्ट्रिङ अप्रेसनमा परेबाट के प्रष्ट हुन्छ भने जिल्ला प्रशासन कार्यालयमा सवारी पासका नाममा समेत घुसको कारोवार हुँदोरहेछ । जिल्ला प्रशासन कार्यालय काठमाडौँमा लेखापढी व्यवसाय गर्ने खेमराज सापकोटालाई अख्तियारको टोलीले मंगलवार नै पक्राउ गरेको हो । सापकोटाले सवारी पास बनाइदिने भन्दै सेवाग्राहीबाट ३ हजार रूपैयाँ घुस लिएको अवस्थामा लेखापढी सेन्टरबाटै उनलाई पक्राउ गरिएको आयोगले जानकारी दिएको छ । यसका अलावा राज्यकोषमा जम्मा हुनुपर्ने रकम जम्मा नगरीकन अपचलन गर्ने विद्युत् प्राधिकरणका ८ कर्मचारीविरुद्ध अख्तियारले विशेष अदालतमा मुद्दा दायर गरेको छ ।
सफ्टवेयरमा म्यानुपुलेसन गरी नियमविपरीत बिक्री संशोधन र क्रेडिट बिल दोहोरो पोष्टिङ गर्ने नेपाल विद्युत् प्राधिकरण जनकपुर क्षेत्रीय कार्यालय अन्तर्गत तत्कालीन बर्दिवास उपवितरण केन्द्र (हाल गौशाला वितरण केन्द्र अन्तर्गत) का सञ्जीव शर्मासहित ८ कर्मचारीविरुद्ध आयोगले मंगलवार नै विशेषमा मुद्दा दर्ता गरेको हो । प्राधिकरणका तत्काल कार्यरत केन्द्र प्रमुख तथा अन्य ज्यालादारी कर्मचारीसमेतले नियमविपरीत बिक्री संशोधन र क्रेडिट बिल दोहोरो तथा बहुपोष्टिङ गर्ने कार्य गरेको भनी नेपाल विद्युत् प्राधिकरण, वितरण तथा ग्राहक सेवा निर्देशनालय, काठमाडौँबाट गठित तथा आयोगबाट गरिएको अनुसन्धान छानविन समितिले पेस गरेको प्रतिवेदनसमेतबाट बदनियतपूर्वक राजस्व अपचलन गरेको देखिएपछि मुद्दा दायर गरिएको हो ।
उनीहरूले २० लाख ३५ हजार रूपैयाँ ११ पैसा अपचलन गरेकोमध्ये सरकारको राजस्वमा १ हजार ७ सय २७ रूपैयाँ अशोककुमार कर्ण, रमेश दाहाल र पूजनकुमारी चौधरीसमेतबाट दाखिला गरेको देखिँदा उक्त बिगो घटाई बाँकी २० लाख ३३ हजार २ सय ७२ रूपैयाँ एकसठ्ठी पैसा भ्रष्टाचारजन्य कार्य भएको भन्दै आयोगले मुद्दा दायर गरेको हो । राजस्व रकम अपचलन गर्ने हाकिम सञ्जीव शर्मा, ज्यालादारी कर्मचारीहरू अरविन्दप्रसाद जयसवाल, बागेश्वरीकुमारी कर्ण, चन्द्रभूषण महतो, धर्मेन्द्रकुमार महतो, अजितमान सिंह, स्मिता कट्टेल, अन्जुकुमारी बस्नेतविरुद्ध पनि उनीहरूले हिनामिना गरेको रकमबराबरको बिगो दावी गर्दै आयोगले मुद्दा दायर गरेको हो ।
