- पोखरिया,असार १२ गते शुक्रबार ।
असार प्रत्येक वर्ष हुने असारे विकासको कारण जनताहरु दुःख पाउँदै आएकोमा यस वर्षपनि त्यो कार्यलाई निरन्तरता दिइएको पाइएको छ । प्रत्येक वर्ष आर्थिक वर्षको मसान्त सकिन लाग्दा विकासे कार्यहरु शुरु हुने गरेको नेपाली नागरिकको लागि कुनै नौलो कुरा होइन ।
यसवर्ष कोरोना महामारीलाई पनि पछि पार्दै असारे विकास कार्यलाई ठेकेदारहरुले निरन्तरता दिइरहेका छन् । जसको परिणाम स्वरुप सर्वसाधारणहरुले सास्ती खेप्नु परिरहेको छ । पर्साको पोखरियादेखि लंगडी जाने सडक निर्माण कार्य हुन नसक्दा स्थानीयहरु सास्ती खेप्न बाध्य छन् ।
ठेकेदार कम्पनीको चरम लापरवाहीको कारण पोखरिया बजारदेखि लंगडीसम्म पुग्ने सडक खण्डको निर्माण कार्य समयमा हुन सकेको छैन । प्रदेश २ सरकारको भौतिक पूर्वधार बिकास मन्त्रालयबाट १७ कोरोडको योजनमा अन्तर्गत निर्माण भइरहेको सडक निर्माण कम्पनीको लापरवाहीको कारण यात्रुहरुले सास्ती खेप्न बाध्य छन् भने आवागमन समेत ठप्प भएको छ ।
पोखरिया देखि लंगडी हुँदै मिर्जापुरसम्मको साढे १० किलोमिटर सडक कालोपत्र गर्ने जिम्मा पाएका रोशन, रन्जन, सागर जेभिले वर्षायाम शुरु भएसँगै निर्माण कार्यपनि शुरु गरेपछि सडक हिल्लामे भई अवरुद्ध हुन पुगेको हो ।
सडक निर्माण कार्यको ठेक्का २०७६ असार महिनामा भएपनि निर्माण कार्य भने २०७७ को जेठ अन्तिम सातादेखि शुरु भएको हो । पहिलादेखि नै ग्राइभेल सडक रहेकोमा ठेकेदार कम्पनीले सडक निर्माणको नाममा ग्राइभेलमाथि माटो खसालेर छाडेपछि त्यही माटो हिल्लामे भई सडक झन बिग्रिएर आवागमन प्रभावित भएको हो ।
पर्सा जिल्लालाई सदरमुकाम वीरगञ्जसँग जोड्ने मुख्य सडकको रुपमा रहेकोले दैनिक हजारौं यात्रुहरु आवागमन गर्ने गरेका छन् । सडक ग्राइभेल भएको बेला वर्षा याममा पनि खासै प्रभाव नपरेपनि अहिले माटो खसालेको कारण सडमै दुई फिटसम्म गहिरो हिलो हुने गरेको कारण दुईपाँग्रे सवारी साधनपनि आवागमनमा समस्या भएको हो ।
पोखरियाको बसन्तपुर, कालिकामाईको मुडली, धोबनीको लंगडि स्थित पर्ने सडक हिलाम्मे भएको छ । सडक हिलाम्मे भएपछि सवारी साधनका साथै सर्वसाधरण आवागमन समेत बन्द भएको छ ।
मोटरसाइकल त परै जावस यात्री समेत हिड्न सकिने अवस्था छैन् । स्थानीय सो बाटोको बिकल्पमा लामो यात्रा गरेर गन्तव्य तर्फ जान बाध्य छन्या भएका छन् । सडक निर्माण गर्ने योजनाको जिम्मा लिएका ३ वटा ठेक्दार कम्पनी मध्ये एउटा सोही क्षेत्रका प्रदेश सांसद सिंघासन साह कलवारको निर्माण कम्पनी नै रहेको छ ।
नाम मात्रको ३ वटा कम्पनी भएपनि सडक निर्माणको सबै काम प्रदेश सांसद् कलवारकै निर्माण कम्पनीले गरिरहेको छ । प्रदेश सांसद् कलवारको निर्माण कम्पनी रन्जनको सडक निर्माणको क्रममा भएको लापरवाहीले उनकै क्षेत्रका जनताले दुःख पाइरहेका छन् ।
सडक निर्माणको लागि मिति २०७६ असार २२ गते योजना सम्झौता भई २ वर्षे योजना अनुसार मिति २०७८ असार २१ गते सम्पन्न हुने सम्झौता भएपनि हालसम्म १० प्रतिशत मात्रै काम पुरा भएको विकास कार्यालय वीरगञ्जका इन्जिनियर बिकास मिश्राले बताए ।
उनका अनुसार पोखरियादेखि बसन्तपुर, मुडली, लंगडी, हरिहरपुर, भलुवहिया भएर मिर्जापुरसम्म साढे १० किलो मिटर कालोपत्रे गर्नुपर्नेछ । आर्थिक वर्ष २०७५÷०७६ को प्रदेश सरकारको योजना अन्तर्गत प्रदेश सांसदकै निर्माण कम्पनीद्वारा काम सुरु गरिएपनि हालसम्म कलभर्टहरु ३ वटा निर्माण र माटो खसाल्ने काम मात्रै भएको छ ।
