काठमाडौं ,असार ९ गते ।

नेपालका ७७ जिल्ला मध्ये ७६ वटा जिल्लामा कोरोना भाइरस ९कोभिड १९० को संक्रमण फैलिएको हो । आईतबार ओखलढुंगामा कोरोना संक्रमित पुष्टि भएसँगै संक्रमित हुने कुल जिल्ला ७६ पुगेको हो । रसुवा देशकै एक मात्र कोरोना संक्रमित नभएको जिल्ला भएको हो ।

देशभर दिनप्रतिदिन कोरोना संक्रमितको संख्या बढ्दै गएको छ । देशको एकमात्र कोरोनारहित जिल्लामा कोरोना रोकथामका लागि रसुवालाई थप सुरक्षित बनाउन पूर्वतयारी थालिएको छ । जिल्ला प्रबेश गर्ने नाका बेत्रावती तथा सरमथलीमा कडाई गरिने, आवश्यकता अनुसार स्थानीय तहहरुमा क्वारेन्टाइन थप गर्ने, भएका क्वारेन्टाइनलाई व्यवस्थित बनाइने भएको छ । त्यसैगरि जिल्लाको पाँच वटै गाउँपालिकामा केश अनुसन्धान तथा सम्पर्क खोजी टोलि गठन गरिने भएको छ । टोलीले शंकास्पद बिरामीको खोजी गर्ने, हिस्ट्री संकलन गर्ने लगायतका गतिबिधिहरु गर्ने स्वास्थ्य कार्यालय रसुवाले जनाएको छ ।

सोमबार विभिन्न जिल्लाका थप ५ सय ३५ जनामा कोरोना संक्रमण देखिएको छ । स्वास्थ्य तथा जनसंख्या मन्त्रालयले गरेको नियमित पत्रकार सम्मेलनमा पछिल्लो २४ घन्टामा ५ सय ३५ जनामा कोरोना संक्रमण देखिएको जानकारी दिएका छन् ।

मन्त्रालयका प्रवक्ता डा. जागेश्वर गौतमले विभिन्न जिल्लामा ५ सय ३५ जना थपिएसँगै देशभर संक्रमितको संख्या ९ हजार ५ सय ६१ पुगेको जानकारी दिए । संक्रमितमध्ये अहिलेसम्म २ हजार १ सय ४२ जना उपचारपछि घर फर्किएका छन् भने २३ जनाले ज्यान गुमाएका छन् ।

पाल्पामा ९० जना, कैलालीमा ५८ जना, गुल्मीमा ५५, सर्लाहीमा ४७, रौतहटमा ३४, स्याङ्जामा ३३, प्यूठानमा ३०, सिराहामा २३, नवलपुरमा १६, डडेलधुरा र सप्तरीका १५/१५ जना, बैतडीका १४ र दाङमा १३ जना कोरोना संक्रमित थपिएका छन् ।

त्यस्तै मोरङ र रुपन्देहीमा १२/१२ जना, तनहुँमा ११, धनुषामा १०,अर्घाखाँचीका ९ जना, नवलपुरका ८, डोटीका ७, नवलपरासी र चितवनका ५/५ जना, झापाका ३, अछाम र सिन्धुपाल्चोकका २/२ जना, महोत्तरी, गुल्मी, जाजरकोट र ओखलढुंगाका १/१ जनामा कोरोना पुष्टि भएको डा. गौतमले जानकारी दिए ।