काठमाडाैं, जेठ २८ गते बुधबार । भारतमा कोरोना भाइरसबाट सङ्क्रमितको संख्या दिनप्रतिदिन बृद्धि हुदै गइरहेको छ । अघिल्ला दिनहरुमा भन्दा पछिल्ला दिनहरुमा दैनिक सङ्क्रमितको संख्या बढ्दै गइरहेको तथ्यांकले देखाएको छ ।
अहिले एसियाकै महामारी केन्द्र बनिरहेकाे भारत विश्वमा काेराेना संक्रमित देशकाे लहरमा छैटाैँ स्थानमा छ । एसियाली देशहरूमा भने सबैभन्दा बढी काेराेना भाइरसक संक्रमितहरू भारतमै फेला परेका छन् ।
भारतमा पछिल्लो २४ घण्टाको अवधिमा १० हजार २१८ जना कोरोनाभाइरसबाट सङ्क्रमित भएका छन् । योसँगै देशभरी अहिलेसम्म सङ्क्रमितको संख्या २ लाख ७६ हजार १४६ पुगेकाे वर्ल्डाे मिटर्सले जनाएकाे छ । मंगलबार बिहानसम्म भारतमा संक्रमितकाे संख्या २ लाख ६५ हजार ९२८ थियाे ।
त्यसैगरी भारतमा पछिल्लाे २४ घण्टामा काेराेनाभाइरसका कारण २७७ जनकाे मृत्यु भएकाे छ । याेसँगै भारतमा काेराेनाभाइरसबाट मृत्यु हुनेकाे संख्या ७ हजार ७५० जनाको पुगेकाे छ ।
अहिले पनि भातरमा १ लाख ३३ हजार ७२६ जना सङ्क्रमित अवस्था मै रहेका छन् । तीमध्ये ८ हजार ९४४ जनाकाे अवस्था भने गम्भीर रहेकाे छ । त्यसैगरी १ लाख ३४ हजार ६६० जना सङ्क्रमण मुक्त भएर घर फर्किसकेका छन् ।
मन्त्रालयको तथ्यांक अनुसार अहिलेसम्म सवैभन्दा धेरै सङ्क्रमितको संख्या महाराष्ट्र प्रदेशमा रहेको छ । दोस्रो धेरै सङ्क्रमित रहेको तमिलनाडु प्रदेशमा रहेको मन्त्रालयले जनाएको छ ।
भारतमा पछिल्लो समयमा लकडाउनलाई खुकुलो बनाउदै लगिएको र परिक्षणको मात्रा पनि बढाइएकाले सङ्क्रमितहरुको संख्या धेरै देखिदै गएको अधिकारीहरुले बताएका छन् ।
