जन प्रभाब / २०७७ जेठ १३ गते ।
काठमाडौं : संयुक्त राज्य अमेरिकामा कोरोना भाइरस (कोभिड-१९)बाट संक्रमित हुनेकाे संख्या १७ लाख नाघेकाे छ भने करिब १ लाख मानिसकाे मृत्यु भइसकेकाे छ ।
विभिन्न तथ्यांक निकाल्ने संस्था वर्ल्डो मिटर्सका अनुसार अमेरिकामा अहिलेसम्म १७ लाख ६ हजार २२६ जना भाइरसबाट संक्रमित भइसकेका छन् । साेमबार मात्र त्यहाँ १९ हजार ७९० जना काेराेना संक्रमित भेटिएकाे जनाइएकाे छ । याे संख्या विगतकाे तुलनामा कमै हाे ।
मंगलबार बिहानसम्म अमेरिकामा कोरोना भाइरस संक्रमणका कारण मृत्यु हुनेकाे संख्या ९९ हजार ८०५ पुगेकाे छ । पछिल्लाे २४ घण्टा अर्थात् साेमबार मात्र त्यहाँ ५०५ जनाकाे मृत्यु भएकाे छ । याे झण्डै २ महिनायताकै कम हाे । यसअघि मार्च २९ मा दैनिक मृत्यु संख्या ४९७ थियाे ।
अमेरिकामा हाल मृत्युदर घटेसँगै निकाे हुने दर बढ्दै छ । त्यहाँ अहिलेसम्म कुल संक्रमितमध्ये ४ लाख ६४ हजार ६७० जना भने पूर्ण रुपमा निको समेत भइसकेका छन् । बाँकी ११ लाख ४१ हजारभन्दा बढी संक्रमित हाल उपचाररत छन्, जसमध्ये १७ हजारबढीकाे अवस्था खतरापूर्ण रहेको जनाइएको छ ।
सबैभन्दा बढी प्रभावित अमेरिकी राज्य न्यूयोर्कमा पछिल्ला दिनहरूमा संक्रमित संख्या र मृत्युका घटना न्यून हुँदै गएका छन् । अहिलेसम्म न्यूयोर्कमा ३ लाख ७२ हजारभन्दा मानिस संक्रमित भएका छन् भने २९ हजार ३१० जनाकाे मृत्यु भइसकेकाे छ । त्यहाँ साेमबार १ हजार ३०१ जना नयाँ संक्रमित थपिएका छन् भने ७९ जनाकाे मृत्यु भएकाे छ ।
अर्को बढी प्रभावित राज्य न्यूजर्सीमा पनि कोरोनाका कारण ज्यान गुमाउनेको संख्या ११ हजार १५५ पुगेको छ । न्यूजर्सीमा काेराेना संक्रमितकाे संख्या १ लाख ५६ हजार नाघेकाे छ ।
दाेस्राे लहरकाे चेतावनी
पछिल्ला दिनहरूमा अमेरिकामा कोरोना संक्रमण बढ्ने क्रम रोकिने संकेत देखिएका छन् । तर त्यहाँ मान्छेहरूले संक्रमणप्रति बेवास्ता गर्न थालेसँगै महामारी दाेस्राे लहर दाेहाेरिने चिन्ता समेत व्यक्त भइरहेका छन् ।
राष्ट्रपति कार्यालय ह्वाइट हाउसका कोरोनाभाइरस संयोजक डेबोरा बर्कले आइतबार भने कि उनी सुरक्षित रहनका लागि ७ फिट दूरी कायम राख्न बेवास्ता गरिरहेका व्यक्तिहरूप्रति “धेरै चिन्तित” छिन् । ‘व्यस्त मेमोरियल डे सप्तान्त’मा व्यस्त हुनुअघि पनि केही विज्ञहरूले अमेरिकाकाे मध्य पश्चिमा र दक्षिणी क्षेत्रमा नाेबल कोरोनाभाइरसको दोस्रो लहरका घटनाहरूको चेतावनी दिएका थिए ।
फेसबुकबाट तपाईको प्रतिक्रिया !