सप्तरी ,जेठ ११ गते आइतबार । प्रतिनिधि सभा सदस्य डा. सुर्यनारायण यादवले कृष्णा कुमार यादव ‘कृष’लाई षडयन्त्रपुर्वक फँसाएको आरोप लगाएका छन् ।
सप्तरीको हनुमाननगर कंकालिनी नगरपालिका–१४ निवासीलाई प्रहरीद्वारा कृत्रिम प्रमाण खडा गरि फँसाएको आरोप साँसद यादवले लगाएका हुन् । सांसद डा. यादवले आइतबार प्रेस विज्ञप्ति जारी गर्दै सुनसरी प्रहरीले भण्टाबारीबाट नियन्त्रणमा लिएको कृष भनिने कृष्णा कुमार यादव निर्दोष रहेको दाबी गरेको छ ।
उनी सवार गाडीमा स्थानीय जनप्रतिनिधि र भद्रभलादमीको रोहवरमा प्रहरीले खानतलासी गर्दा केही नभेटिएपछि प्रहरीले नै २० किलो मिटरपुर्व भोक्राहामा लगेर कृत्रिम प्रमाण बनाएर यादवलाई फँसाईएको उनको दावी छ । स्वतन्त्रपुर्वक बाँच्ने अधिकार राज्यबाट कुण्ठित गर्न नमिल्ने भन्दै षडयन्त्रपूर्ण तरिकाबाट फँसाईएको भन्दै उनले उक्त कार्यको भत्र्सना गरेका छन् । निर्दोष ब्यक्तिलाई पेस्तोल र लागुऔषध भिडाएर कृत्रिम प्रमाणको आधारमा प्रहरीले नियन्त्रणमा लिनु कानूनी राज्यको उपहास भएकोले सत्यतथ्य छानबिन गरि दोषीलाई कार्बाही गरि यादवलाई चाँडै रिहाई गर्न जारी बिज्ञाप्तिमार्फत आग्रह गरिएको छ ।
यता समाजवादी पार्टीका जिल्ला अध्यक्ष केदार यादव र घटना स्थल भाण्टाबारी सुनसरीका जनप्रतिनिधिले छुट्टाछुट्टै प्रेस विज्ञप्ति जारी गर्दै घटनाको विरोध जनाएका छन् । प्रहरीले भने यादवलाई हातहतियार र लागुऔषध सहित भोक्राहाबाट नियन्त्रणमा लिएको भनी दाबी गर्दै आएका छन् । गत जेठ ६ गते सुनसरीको भण्टाबारीबाट सवारी साधन,चालक सहित पक्राउ परेका थिए ।
