कृष्णा यादव बिरगंज , जेठ ९ गते शुक्रबार । वीरगन्ज महानगरपालिकाले कोरोना परीक्षण गर्ने पीसीआर मेशिन खरिदको तयारी गर्दैछ ।
कोरोना भाईरस कोभिड—१९ को उच्च जोखिममा रहेको वीरगन्ज महानगरपालिकाले अस्पताल संचालनमा ल्याएपछि महानगरवासीलाई सुरक्षित राख्न पीसीआर मेशिन पनि स्थानीय सरकारको तर्फबाटै खरिद गर्ने तयारी गरेको हो ।
वीरगन्ज महानगरपालिकाको करिब डेढ महिनादेखिको प्रयासमा गण्डक अस्पताललाई कोरोना विशेष अस्पतालको रुपमा संचालनमा ल्याउन सफल भएपछि महानगरपालकाले पीसीआर मेशिन खरिद गर्ने तयारी गर्न लागेको हो ।
नारायणी अस्पतालमा ७१ जना र २५ जनाको सिद्धार्थ माध्यामिक विद्यालयमा बनाईएको सेमी आईशोलेसनमा उपचार भईरहेकोमा गण्डक अस्पताललाई नारायणी अस्पतालकै इकाईको रुपमा कोरोना अस्पताल बनाएपछि अहिले सिद्धार्थ माध्यामिक विद्यालयमा रहेका २४ जनालाई गण्डकमा बिहीबार सारिएको छ ।
लामो राजनीतिक लडाईपछि वीरगन्ज महानगरपालिकाले केन्द्र सरकारसँग पहल गरेर गण्डक अस्पताललाई कोभिड अस्पतालको रुपमा संचालनमा ल्याउन सफल भएको हो ।
गण्डक हस्पिटलका संचालक एवं नेकपाका महानगरअध्यक्ष रहबर अन्सारीले कोभिड अस्पताल बनाउन निःशुल्क दिने घोषणा गरेपछि शुरु भएको राजनीतिमा अन्तत पूर्णविराम लागेको छ ।
सरकारी प्रकृयाको झण्झट, आप्mनै पार्टीको नेतृत्वमा रहेको प्रदेश सरकारको अवरोध तथा व्यक्तिगत राजनीतिक प्रतिशोधको भावनाले ल्याएको अवरोध तथा विभिन्न आलोचना र टिकाटिप्पणीकाबीच पनि कोभिड अस्पताल स्थापना गर्न निरन्तर लागि रहेका वीरगन्ज महानगरपालिकाका मेयर विजय कुमार सरावगीलाई जिल्लाका राजनीतिक दल, नेकपाका नेताहरु र स्थानीयले दिएको समर्थनले कोभिड अस्पताल स्थापनामा सफलता प्राप्त भएका हो ।
अस्पताल स्थापनामा अहोरात्र खटेका मेयर सरावगीलाई आप्mनै दलका नेता र कार्यकर्ताहरुले पनि कडा अलोचना गरेर विभिन्न आरोप समेत लगाएका थिए ।
तर, उहाँ ती आरोप र आलोचनाको पछि नलागि वीरगन्ज महानगरपालिकालाई कोरोना भाईरस कोभिड १९ बाट कसरी बचाउन सकिन्छ भन्नेतर्फमात्रै निरन्तर लागिरहनु भयो । वीरगन्ज महानगरपालिकाका कर्मचारी, नारायणी अस्पतालका चिकित्सक तथा स्वास्थ्यकर्मीहरुको पनि उहाँलाई भरपुर सहयोग र साथ रह्यो ।
उहाँ कोभिड अस्पताल स्थापना गर्ने लडाईमा अग्रपंक्तिमा रहेका थिए । गण्डक अस्पताललाई कोभिड अस्पताल स्थापना गरी संचालनमा ल्याएपछि अब वीरगन्ज महानगरपालिकाले आप्mनै छुट्टै पीसीआर मेशिन खरिद गर्ने तयारीमा रहेको मेयर सरावगीले बताउनुभयो ।
उहाँले बिहिबार नै सामाजिक सञ्जाल फेसबुकमा पीसीआर मेशिन र किट खरिदको तयारी गरेको भन्दै सहयोगका लागि अनुरोध गर्नु भएको थियो । पीसीआर मेशिन खरिदका लागि छलफल भईरहेको र एकदुई दिनमै बोलबत्र समेत आह्वान गरिने उहाँले बताउनु भयो ।
मेयर सरावगीले भन्नु भयो , “मैले शुरुमै भनेको थिए वीरगन्जमा पाँच हजारको पीसीआर परीक्षण गर्नुपर्छ । अब संक्रमितको संख्यापनि वृद्धि हुदै गएको छ ।
त्यसैले अब १५ हजार किट र पीसीआर मेशिन खरिदको तयारीमा छौं । एकदुईदिन मै बोलपत्र पनि आह्वान गर्ने तयारीमा छौं ।” पीसीआर मेशिनको खरिदका लागि छलफल चलिरहेकोले यसमा चाडै निर्णय हुने पनि बताउनु भयो ।
उनले भन्नु भयो , “म जर्मनीमा निर्मित मेशिनको खोजीमा छु । अहिलेसम्म जर्मनीको मेशिन नै धेरै संचालनमा रहेको र भरपर्दो पनि भएकोले त्यही मेशिन ल्याउने सोचमा छु ।” मेयर सरावगीले महानगरपालिका आफैले पीसीआर मेशिन खरिद गर्ने र सहयोगका लागि सामाजिक सञ्जालमा अनुरोध गरेपछि सहयोग गर्नेहरुपनि अगाडि आउन थालेका छन् ।
बाल विवाह तथा कुरीति विरुद्धको अभियानमा लागेका सामाजिक अभियन्ता वृजेश्वर कुमार चौधरीले व्यक्तिगत ५ हजार ५१ रुपैंया सहयोग गर्ने घोषणा गर्नु भएको छ ।
