जन प्रभाब-सम्बादाता / २०७७ जेठ ८ गते बिहिवार ।
भाण्टावारी : सुनसरी जिल्लाको भाण्टावारीमा मंगलवार आएका सप्तरीका कृष यादवलाई सुनसरी प्रहरीले भारतीय नम्बर प्लेटको गाडीमा पेस्तोल र लागुऔषधसहित पक्राउ गरेको छ ।
जिल्ला प्रहरी कार्यालय सुनसरीका अनुसार सप्तरीको हनुमाननगर कंकालिनी नगरपालिक वडा नम्बर – १४ का कृष भनिने कृष्णकुमार यादवले भारतीय नम्बर प्लेटको बीआर ५० पी १२४१ नम्बरको स्कारपियोमा हतियार तथा लागूऔषध ओसार पसार भइरहेको भन्ने गोप्य सूचनाका आधारमा उनलाई पक्राउ गरेको हो ।
जिल्ला प्रहरी कार्यालय सुनसरीले भोक्राहानर्सिङ गाउँपालिका वडा नम्बर – ४ मा उनी सवार स्कारपियोबाट कटुवा पेस्तोल १ थान, सोही पेस्तोलको गोली ३ थान, डाइलेक्स डीसी १०० एमएलको २५ बोतल, स्पासमोप्रोक्सीभन प्लस ५७६ ट्यावलेट, नाइट्रव्सम १६० ट्यावलेट, नाइट्राभेट ७५ ट्यावलेट र १ थान मोबाइलसमेत बरामद गरेको जनाएको छ ।
सप्तरीमा समेत विभिन्न हत्या काण्डमा मुछिएका यादवको सम्बन्धमा थप अनुसन्धान भइरहेको जिल्ला प्रहरी कार्यालय सुनसरीले जनाएको छ ।
प्रहरीले लकडाउनका समयमा लागुऔषध र हतियारसहित उनी सुनसरी आएको सुचनाका आधारमा पक्राउ गरेको दावी गरेपनि कोशी गाँउपालिका वडा नम्बर – ८ का वडाअध्यक्ष विन्देश्वर यादवले भने सुनसरी प्रहरीले कृषलाई भाण्टावारी बजारबाट नियन्त्रणमा लिएर भोक्राहासम्म लगि झुठा आरोपमा फसाउनका लागी हतियार र लागूऔषध फेला परेको घटनामा कुनै सत्यता नभएको दावी गरेका छन ।
वडाअध्यक्ष यादवले एक विज्ञप्ती जारी गर्दै भाण्टावारी बजारमा लकडाउन प्रभावितलाई राहत वितरण गर्नका लागी साझ ४ बजेर ३० मिनेटको समयमा छलफल गर्दै गर्दा जिल्ला प्रहरी कार्यालयका प्रहरी नायव उपरिक्षक विनोद शर्मा नेतृत्वको टोलीले कृष यादवको स्कारपियो नियन्त्रणमा लिएर खान तलासी गर्दा केही फेला नपारेको जनाएका छन ।
वडाअध्यक्ष यादवले प्रहरीले कृष र उनका सवारी चालक मिथुन यादवलाई नियन्त्रणमा लिएर प्रहरी भ्यानमा लगेपछि कृषको स्कारपियो प्रहरीले आफैले चलाएर लगेकाले प्रहरीले भाण्टावारीमा खान तलासी गर्दा केही फेला नपारेकाले पछि भोक्राहामा हतियार र लागुऔषध फेला परेको दावी झुठा भएको विज्ञप्तीमा उल्लेख गरेका छन ।
वडाअध्यक्ष यादवले भाण्टावारीमा आफनो सामुन्नेमा भेला भएका स्थानियहरुको उपस्थितीमा खानतलासी गर्दा उनको सवारीसाधनबाट कुनै सामान बरामद नभएकाले भाण्टावारीमा जडान गरिएको सिसि टिभीको फुटेज दृष्यमा प्रहरी दावी गरे अनुसारको घटना नभएको जनाएका छन ।
