नेपालमा कोरोना संक्रमणको ११५ दिनमा पहिलो मृत्यु : भयावह स्थितिको शुरूआत

काठमाडौं, जेठ ४ गते आइतबार । अध्ययनका लागि चीनको वुहान पुगेका र त्यहाँबाट जाडो बिदामा घर आएका नेपाली विद्यार्थीमा पहिलोपटक ९ माघ २०७६ मा कोरोना भाइरसको संक्रमण पुष्टि भएको थियो।
चीनको वुहानमै सर्वप्रथम १४ पुस २०७६ मा कोरोनाको संक्रमण देखिएको थियो। त्यसको एक महीना पनि नपुग्दै नेपालमा प्रवेश गरिसकेको कोरोना भाइरस त्यसपछि विश्वभर पुग्यो।
त्यसपछि विश्व स्वास्थ्य संगठनले नै यसलाई विश्वव्यापी महामारी घोषणा गर्‍यो । शुरूआति दिनमा नेपाललगायत दक्षिण एशियाली क्षेत्रमा खासै नदेखिएको यो भाइरसको संक्रमण अहिले क्रमश: यो क्षेत्रमा बढ्दो छ।
हिजो, २ जेठमा मात्रै भारतले संक्रमितको संख्यामा चीनलाई उछिनेको थियो। आज नेपालमा कोरोना भाइरस संक्रमणका कारण पहिलो मृत्यु पुष्टि भएपछि अब दक्षिण एशियाली क्षेत्रमा ज्यान नगुमाएका देशको सूचिमा भुटान मात्रै रहेको छ।
बाँकी सातवटै देशमा कोरोना भाइरसले ज्यान लिइसकेको छ। यद्यपी, ज्यान गुमाएकाको संख्या भने सबैभन्दा थोरै नेपालमै छ- १ जना।
स्वास्थ्य तथा जनसंख्या मन्त्रालयले आज साँझ पुष्टि गरेअनुसार सिल्धुपाल्चोककी ती महिलाले २४ वैशाखमा त्रिभुवन विश्वविद्यालय शिक्षण अस्पताल महाराजगञ्जमा शिशुलाई जन्म दिएकी थिइन्।
त्यहाँबाट डिस्चार्ज भएर घर गएकी उनलाई कोरोनाको लक्षण देखिएपछि काभ्रेको धुलिखेलस्थित् अस्पतालमा ल्याइँदै गर्दा मृत्यु भएको थियो। मृत्यु भएपछि गरिएको परीक्षणमा उनी कोभिड- १९ बाट संक्रमित भएकी र त्यसैको कारण उनको ज्यान गएको पुष्टि भएको छ।
उनमा संक्रमण पुष्टि भएसँगै सिन्धुपाल्चोक जिल्ला पनि कोरोना भाइरस संक्रमितको जिल्लाको सूचीमा थपिएको छ। यससँगै कर्णाली बाहेकका ६ प्रदेशका २८ जिल्लामा कोरोना संक्रमण भइसकेको छ।
भारतसँग सीमा जोडिएका तराईका मोरङ र सुनसरीबाहेकका सबै जिल्लामा संक्रमित देखिएका छन्। प्रदेश २ का सबै जिल्लामा संक्रमित देखिएका छन्।
स्वास्थ्य मन्त्रालयको आज साँझको तथ्यांक अनुसार संक्रमितको संख्या २८१ पुगेको छ र यो संख्या हरेक दिन बढ्दो छ। ९ माघमा पहिलो संक्रमित देखिएको ठ्याक्कै दुई महीनापछि ९ चैतमा दोस्रो संक्रमित देखिएको र चैत महीनाभरमा उक्त संख्या ११ मात्र पुगेको थियो।
तर, वैशाख लागेपछि भने उक्त संख्या उकालो लागेको लाग्यै भयो। ३० वैशाखसम्म २१७ जनालाई देखिएकोमा त्यसपछिका चारमा दिनमा थपिएर २८१ पुगिसकेका छन्।
अहिलेसम्म संक्रमण देखिएका कुनै पनि बिरामीमा गम्भीर लक्षण नदेखिएको, ३६ जना निको भएर अस्पतालबाट डिस्चार्ज नै भइसकेको र उपचाररत बिरामीको स्वास्थ्य पनि सामान्य रहेको हुँदा नेपालमा यसलाई गम्भीर रूपमा लिइएको थिएन।
कोरोना संक्रमणबाट पहिलो व्यक्तिको, त्यो पनि अस्पताल पुर्‍याउँदा नपुर्‍याउँदै ज्यान गएकाले महामारी साँच्चिकै भयावह बन्न सक्ने देखिन्छ।