जनकपुरधाम, जेठ २ गते शुक्रबार । कोरोना संक्रमितको संख्या देशभरी बढ्न थालेपछि प्रहरीले २ नम्बर प्रदेशमा लकडाउनलाई कडा बनाएको छ । सवारी साधनहरु निर्वाधरुपमा हिँड्न थालेपछि प्रहरीले पछिल्लो दुई दिनदेखि लकडाउनमा कडाइ गरेको हो ।
यसैबीच प्रहरीले बिनापास गाडी चलाएको भन्दै २ नम्बर प्रदेशका सांसद अशोक यादवको गाडी नियन्त्रणमा लिएको छ । जनकपुरको भानुचोक नजिकबाट प्रहरीले २ नम्बर प्रदेशका सांसद यादवको गाडी नियन्त्रणमा लिएको जिल्ला प्रशासन कार्यालय धनुषाका प्रमुख जिल्ला अधिकारी ( सिडियो ) कोषहरि निरौलाले जानकारी दिनु भयो ।
प्रहरीले चेकजाँच गर्दा पास देखाउन नसकेपछि गाडीलाई नियन्त्रणमा लिइएको सीडीओ निरौलाले बताए । ‘लकडाउन उल्लंघन गरेर बिनापास सञ्चालन भएका सरकारी गाडीसमेत प्रहरीले नियन्त्रणमा लिएको छ । गाडीमा उहाँ हुनुहुन्थेन। प्रहरीले चालकलाई पास देखाउन भन्यो । पास नदेखाएपछि नियन्त्रणमा लिइएको हो ।’, उनले भने ।
कोरोना संक्रमणको जोखिम बढ्दै जाँदा लकडाउनलाई प्रभावकारी बनाउन कडाइ गर्नुको विकल्प नरहेको निरौलाले बताए । लकडाउन उल्लंघन गरी सञ्चालन भइरहेका सरकारी गाडीसहित सयभन्दा बढी सवारी साधन प्रहरीले शुक्रबार जनकपुरबाट नियन्त्रणमा लिएको जिल्ला प्रहरी कार्यालय धनुषाका प्रवक्ता तथा प्रहरी नायब उपरीक्षक ( डीएसपी ) रामेश्वर कार्कीले जानकारी दिए ।
यसैगरी सरकारी तथा निजी गरी प्रदेश नम्बर – २ मा शुक्रबार साँझसम्म लकडाउन उल्लंघन गरेर हिँड्ने १८२ सवारी साधन नियन्त्रणमा लिइएको प्रदेश प्रहरी कार्यालय जनकपुरधामले जनाएको छ ।
फेसबुकबाट तपाईको प्रतिक्रिया !