काठमाण्डौ,बैशाख ३१ गते बुधबार । सरकारले कोरोना सङ्क्रमण पुष्टि भएका नयाँ बिरामीको कन्ट्याक ट्रेसिङ आजदेखि सुरु गर्ने तयारी गरेको छ ।
हिजो उपत्यकामा तीन जनासहित एकैदिन ८३ जनामा कोराना पुष्टि भएपछि उनीहरुको कन्ट्याक ट्रेसिङ आजदेखि सुरु गर्न लागिएको स्वास्थ्य तथा जनसंख्या मन्त्रालयले जनाएको छ ।
मन्त्रालयका सहप्रवक्ता डाक्टर समिरकुमार अधिकारीका अनुसार सङ्क्रमण पुष्टि भएका व्यक्तिको सम्पर्कमा आएका अरु व्यक्तिको खोजी गरेर उनीहरुको पनि कोरोना परीक्षण गर्ने तयारी छ । हिजो उपत्यकामा तीन जनासहित ८३ जनामा कोरोना पुष्टि भएपछि आजदेखि सम्पर्कमा आएका अरु व्यक्तिको खोजी गर्न लागिएको हो ।
हिजो पर्सामा दुई पत्रकारसहित ५७ जना, रुपन्देहीका ९ जना, कपिलवस्तुका ८ जना, महोत्तरी, धनुषा र भक्तपुरमा दुई–दुई जना तथा काठमाण्डौ, बाराका र सर्लाहीमा एक–एक जना गरी ८३ जनामा कोरोना पुष्टि भएको थियो । यो सँगै नेपालमा कोरोना सङ्क्रमितको संख्या २१७ पुगेको छ । अहिलेसम्म उपचारपछि ३३ जना निको भएका छन्
उपत्यकामा कोरोना देखिएका महिला वैशाख २९ गते काठमाण्डौ आएका थिए
उपत्यकामा कोरोना पुष्टि भएका तीन जनालाई शुक्रराज ट्रपिकल तथा सरुवा रोग अस्पताल टेकुमा राति नै पु¥याइएको छ । काठमाण्डौ र भक्तपुरमा कोरोना पुष्टि भएका दुई महिला गएको २९ गते काठमाण्डौ आएको खुलेको छ । काठमाण्डौ चन्द्रागिरीकी ३३ वर्षकी महिला महेन्द्रनगरबाट र भक्तपुरमा डेरा गरी बस्ने २५ वर्षकी युवती सुनसरीबाट काठमाण्डौ आएको खुलेको छ ।
भक्तपुर दुवाकोटका २८ वर्षका पुरुष भने कताबाट आएको खुल्न बाँकी छ । उनीहरुलाई राती नै टेकु अस्पताल लगेर आइसोलेसनमा राखिएको छ । सबैको अवस्था सामान्य रहेको स्वास्थ्य तथा जनसंख्या मन्त्रालयले जनाएको छ ।
पर्साका सङ्क्रमण पुष्टि भएकाहरुलाई एकै ठाउँमा ल्याउने तयारी
पर्सामा कोरोना देखिएका नयाँ बिरामीलाई एकै ठाउँमा ल्याउने तयारी भएको छ । विभिन्न गाउँमा कोरोना सङ्क्रमित भेटिएपछि उनीहरु सबैलाई आज एकै ठाउँमा ल्याउने तयारी भएको हो । तर धेरै सङ्क्रमित भएकाले कहाँ र कसरी राख्ने भन्नेबारेमा भने निर्णय हुन बाँकी छ । हिजो कोरोना पुष्टि भएका दुई जना पत्रकारलाई भने वीरगन्जको नारायणी अस्पतालमा आइसोलेशनमा राखिएको छ । हिजो ५७ जना नयाँ बिरामी थपिएसँगै पर्सामा मात्रै ८२ जनामा कोरोना पुष्टि भएको छ ।
कुन प्रदेशमा कति सङ्क्रमित
अहिलेसम्म १९ हजार ९ सय ९० जनाको पिसिआर र ५९ हजार ६ सय २७ जनाको आरडीटी विधिबाट कोरोना परीक्षण गरीएकोमा २ सय १७ जनामा कोरोना देखिएको हो । जसमध्ये सबैभन्दा धेरै सङ्क्रमित प्रदेश २ मा भेटिएका छन् । अहिलेसम्म प्रदेश २ मा सबैभन्दा धेरै सङ्क्रमित भेटिएका छन् ।
प्रदेश २ को पर्सामा ८२, धनुषा, बारा र रौतहटमा ३–३, महोत्तरी र सर्लाहीमा २–२ तथा सप्तरीमा १ गरी ९६ जना, प्रदेश ५ को कपिलवस्तुमा २९, बाँके २४, रुपन्देही १६ र बर्दीयामा एक गरी ७० जना, प्रदेश १ को उदयपुरमा ३२, झापामा २ तथा भोजपुरमा एक गरी ३५ जना, वागमती प्रदेशको काठमाडौ ४, भक्तपुर र चितवनमा २–२ धादिङ १ गरी ९, सुदुरपश्चिम प्रदेशको कञ्चनपुरमा ४ र कैलाली एक जना गरी ५ तथा गण्डकी प्रदेशको बाग्लुङमा २ गरी २ सय १७ जनामा कोरोना सङ्क्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
कर्णाली प्रदेशमा भने एक जनामा पनि कोरोना देखिएको छैन । त्यहाँ परीक्षण नै नभएकाले कोही पनि सङ्क्रमित नभेटिएका स्थानीयको गुनासो छ । अहिलेसम्म सङ्क्रमण भएका मध्ये ३३ जना निको भएर अस्पतालबाट डिस्चार्ज भएका छन् । मन्त्रालयका अनुसार प्रदेश १ मा १६, प्रदेश २ मा ५, बागमती र सुदुरपश्चिम प्रदेशमा ५–५ तथा गण्डकी प्रदेशमा २ जना डिस्चार्ज भएका छन् ।
लकडाउन आफ्नै लागि
लकडाउन खुकुलो भएपछि केही दिन यता उपत्यकासहित मुख्य शहरमा गाडीको चाप बढेको छ । तर लकढाउन खुकुलो भयो भन्दैमा अति आवश्यक नपरी घरबाहिर ननिस्कन स्वास्थ्य तथा जनसंख्या मन्त्रालयले आग्रह गरेको छ । मन्त्रालयले कोरोनाबाट आफु र आफ्नो परिवारलाई जोगाउन पनि अति आवश्यक नपरी घरबाहिर ननिस्कन आग्रह गरेको छ ।
मन्त्रालयका सहप्रवक्ता समिरकुमार अधिकारीले कोरोनाबाट बच्न आफै सचेत हुनुपर्ने भन्दै घरघरमा आफैंले कफ्र्यू लगाउनुपर्नेमा जोड दिनुभएको छ ।
यसैबीच कोरोना भाइरसको जोखिम बढेपछि पर्सामा निषेधाज्ञा जारी गरीएको छ । जिल्ला प्रशासन कार्यालयले विज्ञप्ती निकालेर गएराती ८ बजेदेखि जेठ ५ गते राती १२ बजेसम्म लागु हुने गरी पर्सा जिल्लाभर निषेधाज्ञा लागु गरेको जनाएको छ । अब पर्सामा औषधी उपचार र अन्य अत्यावश्यक कामबाहेक कोही पनि घर बाहिर निस्कन पाउनेछैनन् ।
यस्तै पर्सामा सेना परिचालन गरीएको छ । कोरोना नियन्त्रणको लागि नागरीकलाई घरभित्रै बस्न आग्रह गरीएपनि नटेरेकाले नेपाल प्रहरी र सशस्त्र प्रहरीको साथमा स्थानीय प्रशासन ऐन अनुसार सेना परिचालनसमेत गर्ने निर्णय भएको सहायक प्रमुख जिल्ला अधिकारी ललितकुमार बस्नेतले जानकारी दिए ।
