दिल्ली ,बैशाख ३० गते । भारतीय प्रधानमन्त्री नरेन्द्र मोदीले राष्ट्रको नाममा सम्बोधन गर्दै २० लाख करोड भारतीय रुपैयाँ बराबरको विशेष आर्थिक प्याकेजको घोषणा गरेका छन् । लकडाउनको ५४ औँ दिनमा पाँचौ पटकको सन्देशमार्फत् उनले यस आर्थिक प्याकेजबाट देशको आर्थिक गतिविधिलाई रफ्तार दिने आशा व्यक्त गरेका हुन् ।
राहत घोषणा गर्दै मोदीले भने, ‘विश्वले कहिले पनि यस्तो संकट देखेको थिएन । कोरोनाको संकट अभूतपूर्व छ । हामी यो संकटबाट बच्नु पनि छ र अघि पनि बढ्नु छ ।’ सन्देश अघि मोदीले सोमबार मुख्यमन्त्रीहरुसँग ६ घण्टा कुराकानी गरेका थिए ।
मोदीले भने, ‘कोरोना संक्रमणसँग विश्वले लड्न थालेको चार महिनाभन्दा बढी समय भइसकेको छ । यस दौरान विश्वभर ४२ लाखभन्दा बढी संक्रमित भइसकेका छन् । पौने तीन लाखभन्दा बढीको दुःखद् मृत्यु भएको छ ।’
‘यो भाइरसले विश्वलाई तहसनहस गरिदिएको छ । विश्वभर करोडौँ जिन्दगी संकटको सामना गरिरहेका छन् । सारा विश्व एक प्रकारको युद्धमा जुटिरहेको छ । मानव जातिका लागि यो अकल्पनीय छ । यो संकट अभूतपूर्व छ तर थाक्नु, हार्नु, मानिसलाई मन्जुरी दिँदैन ।’
उनले भारतले यस विपत्लाई अवसरमा बदल्ने बताउँदै जिकिर गरे । उनले भने, ‘म एउटा उदाहरण दिन चाहन्छु । जब कोरोनाको संकट सुरु भयो, तब भारतमा एउटा पनि पीपीई किट बन्दैन थियो । एन–९५ मास्क भारतमा नाम मात्रको उत्पादन हुन्थ्यो । आज स्थिति यस्तो छ कि हरेक दिन दुई लाख पीपीई र दुई लाख एन–९५ मास्क बन्दैछ । हामीले यस्तो किन गर्न सक्यौँ भने भारतले विपत्लाई अवसरमा बदल्यो ।’
मोदीले भारतसँग साधन सामर्थ्य र विश्वकै उत्कृष्ट ट्यालेन्ट रहेको बताउँदै भारतले उत्कृष्ट उत्पादन गर्ने र सप्लाई चेनलाई आधुनिक बनाउने प्रतिबद्धता व्यक्त गरे ।
भारतमा अहिले लकडाउनको तेस्रो चरण जारी छ । मे ४ मा सुरु भएको लकडाउन मे १७ सम्म चल्नेछ । सोमबार मोदीले देशका विभिन्न राज्यका मुख्यमन्त्रीहरुसँग भिडियो कन्फरेन्सिङबाट ६ घण्टा छलफल गरेका थिए । छलफलमा उनले मुख्यमन्त्रीहरुसँग १५ मे सम्म लकडाउनको मोडलका लागि सुझाव पेस गर्न आग्रह गरेका थिए । ७ राज्य महाराष्ट्र, बिहार, पञ्जाब, तेलंगाना, पश्चिम बंगाल, हिमाचल र असमले लकडाउन बढाउन सुझाव दिएका थिए । उता, बिहार, तेलंगाना र तमिलनाडुले रेल चलाएको प्रति प्रश्न उठाएका थिए ।
