यूरोपमा कोरोना महामारीको केन्द्र बन्यो बेलायत, इटालीमा भन्दा बढी मृत्यु

एजेन्सी,बैशाख २४ गते । यूरोपमा कोरोनाभाइरस महामारीको केन्द्र बेलायत बनेको छ। कोरोना संक्रमणका कारण मृत्यु हुनेमा युरोपभरिमा बेलायत अग्रस्थानमा पुगेको छ।
बेलायतमा कोरोना संक्रमणबाट हालसम्म २९ हजार ४ सयभन्दा बढी मानिसको मृत्यु भइसकेको छ। त्यहाँ संक्रमितको कुल संख्या १ लाख ९५ हजार छ।
यसअघि यूरोपमा कोरोनाभाइरसबाट मृत्युको मामिलामा इटाली पहिलो नम्बरमा रहेको थियो। इटालीमा संक्रमणबाट ज्यान गुमाउनेको संख्या हालसम्म २९ हजार ३ सयको हाराहारीमा छ। त्यहाँ कुल संक्रमितको संख्या भने बेलायतभन्दा बढी छ। कोरोनाभाइरस सम्बन्धी तथ्यांक राखिएको वर्ल्डोमिटरका अनुसार, इटालीमा २ लाख १३ हजारभन्दा बढीलाई संक्रमण भएकोमा ८५ हजार २ सयभन्दा बढी उपचारपछि घर फर्किएका छन्।
यस्तै, अर्को यूरोपेली मुलुक स्पेनमा २ लाख ५० हजार ५ सयभन्दा बढी संक्रमित भएकोमा हालसम्म २५ हजार ६ सय १३ जनाको मृत्यु भएको छ। फ्रान्समा संक्रमितको संख्या १ लाख ७० हजार ५ सय नाघेको छ, जसमध्ये बुधबार दिउँसोसम्म २५ हजार ५ सय ३१ जनाको मृत्यु भइसकेको छ।
यस्तै, जर्मनीमा १ लाख ६७ हजारभन्दा बढीमा संक्रमण फैलिएकोमा हालसम्म ६ हजार ९ सय ९३ जनाको मृत्यु भएको छ।
रूसमा नयाँ संक्रमित थपिने दर बढेको छ। मस्कोमा लगातार तीन दिनमा १० हजारभन्दा बढी नयाँ संक्रमित भेटिएका छन्। यससँगै त्यहाँ संक्रमितको संख्या १ लाख ६५ हजार ९ सय नाघेको छ। तीमध्ये हालसम्म १ हजार ५ सय ३७ जनाको मृत्यु भइसकेको छ।
संसारभरमै कोरोना संक्रमणबाट सबैभन्दा बढी प्रभावित अमेरिकामा संक्रमितको संख्या १२ लाख ३७ हजार ७ सय नाघेको छ। त्यहाँ पछिल्लो २४ घण्टामा ४ सयको हाराहारीमा नयाँ संक्रमित थपिएका छन्। संक्रमणका कारण अमेरिकामा हालसम्म ७२ हजार २ सयभन्दा बढीको मृत्यु भइसकेको छ भने २ लाखभन्दा बढी उपचारपछि घर फर्किएका छन्।
विश्वमा कोरोनाभाइरस संक्रमितको संख्या ३७ लाख ४४ हजार नाघेको छ। संक्रमितमध्ये २ लाख ५८ हजार ८ सयभन्दा बढीको मृत्यु भइसकेको छ भने १२ लाख ४९ हजारभन्दा बढी संक्रमणमुक्त भएका छन्।