नेपालगञ्ज, बैशाख २२ गते ।स्वास्थ्य मन्त्रालयले नेपालगञ्जका लागि २५० पिस कोरोना परिक्षण गर्ने पीसीआर किट पठाएको छ । नेपालगञ्जमा १६ जना कोरोना संक्रमित भेटिएपछि थप परीक्षण किट, स्वास्थ्य सामाग्री, प्राविधिक र उपकरणहरुको व्यवस्था गर्नु पर्ने माग गर्दै बाँकेका सांसदहरुले स्वास्थ्यमन्त्रीलाई भेटेर ध्यानाकर्षण गराएपछि स्वास्थ्य मन्त्रीको निर्देशनमा २५० किट नेपालगञ्ज पठाईएको हो ।

आइतवार एकै दिन १५ जना संक्रमित भेटिएपछि कोरोना सर्वसाधारणमा फैलिएको आशंका बढेकोले बाँकेका ५ जना सांसदहरुले सोमवार स्वास्थ्यमन्त्री भानुभक्त ढकाललाई मन्त्रालयमै गै भेटेर विभिन्न मागहरु गरिएलगत्तै स्वास्थ्यमन्त्रीले २५० थान किट पठाउन लगाएको र अन्य सामाग्री पठाउने तयारी भैरहेको पुर्वमन्त्री तथा बाँके क्षेत्र नम्बर २ का सांसद मोहम्मद ईश्तियाक राईले बताउनु भयो ।

उहाँले भेटमा मन्त्रीसंग बाँकेमा थप किट पठाउनुका साथै सबै नगरवासीको स्वास्थ्य परिक्षणको व्यवस्था मिलाउनु पर्ने, थप स्वास्थ्य उपकरण लगायत प्राविधिक टोली पठाउनु पर्ने र तेस्रो चरणका लागि अस्पतालहरु निर्माण गर्नु पर्ने माग गरिएको बताउनु भयो ।

स्वास्थ्य मन्त्री ढकालसंग भेट गरेर नेपालगञ्जलाई उच्च प्राथमिकतामा राखेर युद्धस्तरमा काम गर्नु पर्ने माग गर्ने टोलीमा पुर्वमन्त्री राई लगायत बाँके क्षेत्र नम्बर १ का सांसद महेश्वर गहतराज अथक, बाँके क्षेत्र नम्बर ३ का सांसद ननदलाल रोकाया, बाँकेबाट समानुपातिक सांसदहरु पुर्णा कुमारी सुवेदी र सर्वतआरा खानम हुनुहुन्थ्यो । 
सो अवसरमा बाँके क्षेत्र नम्बर एकका सांसद अथकले तत्काल नेपालगञ्जमा परिक्षणलाई बढाउनु पर्ने माग गर्दै थप अस्पताल लगायत अन्य तयारीलाई पनि तिव्र पार्नु पर्ने कुरामा जोड दिनु भएको थियो ।

सोही अवसरमा सांसद पुर्णा कुमारी सुवेदीले पनि अहिलेको अवस्था हेर्दा बाँकेमा भयावह स्थिति हुनसक्ने आशंका व्यक्त गर्दै सरकारले तत्काल सबै तयारी गरिहाल्नु पर्नेमा जोड दिनुभयो । 
सांसदहरुको जिज्ञासाको जवाफ दिंदै स्वास्थ्यमन्त्री ढकालले सरकारले नेपालगञ्जको अवस्थालाई निकै गम्भीरतापूर्वक लिएको जनाउँदै कोरोना फैलिन नदिन सबै कार्यहरु गरिने बताउनु भएको पुर्वमन्त्री राईले बताउनु भयो ।

मन्त्री ढकालले २५० पिस किट तत्काल पठाउन लगाईएको जनाउँदै थप टोलीसंगै अन्य स्वास्थ्य सामाग्री पनि पठाइने प्रतिवद्धता जनाउनु भएको सांसद अथकले बताउनु भयो । 
शुक्रवार नेपालगञ्जमा एक जना ६० वर्षिय पुरुषमा कोरोना पोजेटिभ भेटिएपछि उनको सम्पर्कमा आएकाहरुमध्ये ५५ जनाको परिक्षण गर्दा थप १५ जना संक्रमित भेटिएका थिए ।