सिरहाको लक्ष्मीपुर पतारी गाउँपालिकाले समयमै राहत बाँडेपछि स्थानीय खुशी

जन प्रभाब-सम्बादाता / २०७७ बैशाख १५ गते .


सिरहा । सिरहाको लक्ष्मीपुर पतारी गाउँपालिकाद्वारा समयमै राहत वितरण भएपछि त्यहाँका पीडित स्थानीयहरु खुशी भएका छन् । सिरहाका १७ वटा स्थानीय तहमध्ये ६ वटा नगरपालिका र ३ वटा गाउँपालिका गरी ९ वटा पालिकालेमात्र राहत वितरण गर्न सकेको छ भने २ वटा नगरपालिका र ६ वटा गाउँपालिका गरी ८ वटा पालिकाले हालसम्म राहत वितरण गरेका छैनन् । 

 
एक महिनाभन्दा बढि समयदेखि जारी रहेको लक डाउनका कारण सिरहासहित नेपालभरी मुख्यत दैनिक ज्यालादारी गरी खाने, अति विपन्न परिवारहरु  मारमा पर्दै आएका छन् । लक्ष्मीपुर पतारी गााउँपालिकाले पारदर्शीरुपमा राहत वितरण गरिएपछि त्यहाका पीडित स्थानीयहरु खुशी भएका छन् ।

राहत बितरण कार्यलाई पारदर्शी र न्योयोचित बनाउन विशेष ध्यान दिइएको गाउँपालिका प्रमुख राम बल्लभ साहले बताए । ‘गाउँपालिकाभित्र रहेका सबै वडामा पहिलो चरण जनचेतनाको कार्यक्रम गरी प्रदेश सरकारको राहत वितरण कार्यक्रम कार्यविधि अनुसार घर परिवार छनौटको लागी प्रत्येक वडामा परिपत्र गरी सोही अनुरुप तथ्यॉक संकलन भयो,’ अध्यक्ष साहले भने – ‘तथ्यांक संकलन भएपश्चात हामीले कार्यपालिका बैठक बसी प्रत्येक वडालाई तीन लाख पचास हजारका दरले रकम बाँडफाड गरी पठायौं र विना अवरोध राहत वितरण कार्यक्रम समपन्न भयो ।’ 


पालिका भित्र रहेका गरिब असहाय परिवारलाई राहत अत्यावश्यक भएकोले समयमा पालिकाले राहत वितरण गर्दा दलित, गरीब परिवारमा बास्तबिक  राहत पुगेको स्थानीय सुनिल रामले बताए । गाउँपालिकामा पहिलो चरणको राहत वितरण कार्यक्रम समपन्न भएको जानकारी दिंदै अब दोस्रो चरणको राहत वितरण कार्यक्रमको तयारी गरिरहेको प्रमुख प्रशाकीय अधिकृत धनिकलाल यादवले जानकारी दिए।