मनोज बनैता, सिरहा, ४ बैशाख । पित्त पत्रकारिता गरेको भन्दै लाहान नगरपालिकाको अफिसियल पेजबाट राति ११:५० मा धम्कीयुक्त स्टेटस पोस्ट भएको छ । नयाँ पत्रीका दैनिकमा सिरहा सम्बादाताका रुपमा काम गर्ने पत्रकार मणि लाल बिश्वकर्मा लाई लक्षित गरि उक्त पोस्ट गरिएको खुलेको छ । हिजो राहत बितरणमा भएको कमिकमजोरी समेटी समाचार प्रकाशित गरेकोमा उनलाई यस्तो धम्की दिईएको उनी बताउँछन् ।

पेजमा लेखिएको छ ‘कोभिड-१९ को विश्वव्यापी महामारीले आक्रान्त आम जनतालाई स्थानीय सरकारले गरेको राहत सहयोगलाई लिएर निराधार सामाचार सम्प्रेषण गर्ने पित्त पत्रकारिता गर्ने पत्रकारलाई कठघडामा उभ्याउनु आजको आवश्यकता हो। यस्तो विषम परिस्थितिमा पनि राजनैतिक दुनो सोझ्याउने पर्दा पछाडिका खलनायकलाई नङ्याउनु जरुरी छ। खरबौंको घाटा बेहोरिरहेको विश्व जगतले कोरोना भाइरसबाट मुक्ति खोजेको बेलामा आम जनजीवनलाई जिवित राख्ने माध्यमलाई अवरोध गर्ने तत्वलाई निषेध गर्नु आजको आवश्यकता हो ।’

यसरी स्थानीय निकायले समाचार सम्प्रेषणको बिषयमा कुनै पत्रकारलाई धम्की दिनु निन्दनीय हो भन्दै निज पत्रकार ले नगरपालिकालाई आफ्नो त्रुटि सच्चयाउन आग्रह गरेका छन ।