लगभग दू दशकके बाद स्थानीय सरकार-आशा भेल बेकार

जन प्रभाब जनकपुर । लगभग दू दशकके बाद स्थानीय सरकारक रुपमे जनतासभ स्थानीय तहमे जनप्रतिनिधि पओलक मुदा स्थानीय तहके जनप्रतिनिधिके जाहि रुपे काज करबाक करबाक चाही से नहि भ’ सकल अछि । जनकपुर उप-महानगरपालिकामे जनप्रतिनिधि अएलाक बाद जनकपुरके विकास हएत से आशा नगरबासीके छल । मेयर लालकिशोर साह बहुत बेशी मतान्तरसँ चुनाव जितल रहैथ । जनता हुनकासँ बहुत बेशी आशा रखने रहए जे ओ अपन पुरान अनुभवसँ नगरके विकास करता आ नव रुप देता । मेयर साह पछिला समयमे चर्चितो भेलैथ मुदा काजसँ नइँ, सवा करोडकेँ गाडी चढिक’ । विकासके सूचकमे कमजोर रहल उप महानगरपालिकाके मेयर कत्तेक सुविधाभोगी छथि से हुनक गाडीमोहसँ प्रमाणित भ’ गेल अछि । उप महानगरपालिकासँ सम्बन्धित सार्वजनिक सूचना आम जनताके उपलब्ध नहि छैक । कतेको सञ्चारकर्मी पालिकाके सार्वजनिक सूचनाबास्ते निवेदन दर्ता करौने छथि । जहन कि नगरपालिकाके दायित्व छै जे ओ सार्वजनिक महत्वकेँ सूचनाके स्वतः सार्वजनिक करए । बजेट मांग’लेल वार्ड अध्यक्षके सूचनाके हक प्रयोग करबाक स्थिति जनकपुर उप महानगरपालिकेमे हेतै । एकगोटे वार्ड अध्यक्ष गतवर्ष बजेटके विवरण मंगैत निवेदन देने रहथि उप महानगरपालिकामे । कर्मचारीतन्त्र जहिया स्थानीय निकाय चलबैत रहए, जनप्रतिनिधिसब नइँ रहथि त इ कहल जाय जे जनप्रतिनिधि बहाली भेलाके बाद विकास हेतै, बजेट सदुपयोग हेतै, पारदर्शिता अओतै । आब त कए वर्ष बिति गेल छै जनप्रतिनिधि अएला, तहन किया नइँ विकास गति पकडनै छै ? एहिके उत्तर खोज’ पडत । किया बजेटके गोप्य राखल जाइछै ? खर्च विवरण स्वतः वेबसाइटमे सार्वजनिक हएबाक चाही किया नइँ राखल जाइछै ? जनकपुर मच्छरसँ त्रस्त अछि, नेपालमे डेंगु रोग सेहो पएर पसाइर रहल अछि । एहनमे स्वच्छताके दुहाइ देनिहार मेयर मच्छर किया नइँ नियन्त्रण क’ सकल छथि ? डेंगु, मलेरियाजेहन मच्छरके कटलासँ होब’बला रोग लागिक’ नगरमे सन्त्रास मच’सँ पहिनहिँ किया नइँ सतर्कता अपनाओल गेल अछि ? तहिना जानकी मन्दिर जेहन धार्मिक स्थललग सेहो सुग्गर हुलहुल करैत देखाइत अछि । एहिसँ पर्यटक की सोचत ? की ओ आनो के फेरसँ एहिठाम आब’लेल सुझाव देत ? जनकपुरके धार्मिक पर्यटन स्थलके रुपमे विकास करबाक नारा देनिहार इसब किया नइँ सोचैत अछि ? मच्छर कटाक’ कियो किया एत्त’ राति बिताएत ? सुग्गरके हुलमालि देख’ लेल कियो किया जनकपुर आओत ?