जनकपुरधाम, चैत ३ : प्रदेश २ मा कोरोना भाइरसवाट बचाउ र खुल्ला मदिरा उत्पाननमा प्रतिवन्ध लगाउन छलफल भएको छ । कोरोना भाइरसप्रति सतर्कता अपनाउन तथा आवश्यक तयारीका विषयमा प्रदेश सुरक्षा समितिमा छलफल भएको छ । सोमबार जनकपुरधाममा बसेको प्रदेश २ सुरक्षा समितिको बैठकमा कोरोना भाइरसप्रति सतर्कता, घरेलु मदिरा बिक्री नियन्त्रणलगायत विषयमा छलफल भएको हो । कोरोना भाइरसको संक्रमण हुन नदिन जनचेतनामुलक कार्यक्रम चलाउने र कोरोना भाइरसका संक्रमित देखिएको अवस्थामा गर्नुपर्ने कार्यका विषयमा पनि बैठकमा छलफल भएको छ । त्यस्तै, सुरक्षाकर्मीलाई पनि कोरोनाबाट सुरक्षित राख्न आवश्यक सामग्री उपलब्ध गराउने निर्णय भएको प्रदेशका आन्तरिक मामिला तथा कानुन मन्त्री ज्ञानेन्द्रकुमार यादवले बताए ।
यसैगरी, बैठकमा घरेलु मदिरा बिक्री नियन्त्रणका विषयमा पनि छलफल भएको छ । घरेलु मदिरा उत्पादन गर्नेहरूलाई कारबाही गर्न प्रदेश सरकारले शून्य सहनशिलता अपनाउने पनि निर्णय गरेको छ । मन्त्री यादवले घरेलु मदिराका कारण पछिल्लो समय प्रदेशमा २० जनाभन्दा बढीको मृत्यु भइसकेको भन्दै गैरकानुनी रूपमा मदिरा उत्पादन गर्नेहरूलाई कारबाही र अबका दिन यस्ता घटना हुन नदिन गम्भीरतापूर्वक अगाडि बढ्ने बताए । बैठकमा विश्वस्वास्थ्य संगठन र संघीय सरकारबाट प्राप्त निर्देशनअनुसार हालसम्म भएका काम र चुनौतीका विषयमा पनि परामर्श भएको छ । यसका साथै संघीय सरकारले कोरोना सतर्कताका लागि जारी गरेको निर्देशनसहित १३ बुँदे निर्णय पनि सार्वजनिक गरिएको छ । बैठकमा प्रदेश २ आन्तरिक मामिला तथा कानुन राज्यमन्त्री सरोजसिंह कुशवाहा, प्रदेशका नेपाल प्रहरी, सशस्त्र प्रहरी, नेपाली सेना, राष्ट्रिय अनुसन्धान विभागका पदाधिकारीहरू, विभिन्न जिल्लाका प्रमुख जिल्ला अधिकारीहरू, जनस्वास्थ्य प्रमुखहरूलगायतको सहभागिता थियो ।
सुरक्षा गोष्ठीको निश्कर्ष मन्त्री यादववाट
